«Մեդիալաբ» կայքի խմբագիր Մարիաննա Գրիգորյանին ֆեյսբուքյան օգտատեր Հայկ Օհանյանը չի սպառնացել, նրա գրառումները սպառնալիք չեն պարունակում։ Այս մասին NEWS.am-ի հետ զրույցում ասաց Հայկ Օհանյանի փաստաբան Ալեքսանդր Սիրունյանը։
«Հայկ Օհանյանի խոսքերում սպառնալիք չկա, քանի որ սպառնալիք լինում է այն ժամանակ, երբ իրական վտանգ կա խոսքերն իրականացնելու։ Այս դեպքում հայավարի խոսակցություն է եղել, այսպես ասած սուր զրույց, ոչ մի ավելորդ բան»,- ասաց փաստաբանը։
Փաստաբանը նշեց, որ գործի քննությունն այժմ շարունակվում է եւ իրենք շահագրգռված են գործի բազմակողմանի քննություն իրականացնելու հարցում։
Ալեքսանդր Սիրունյանի կարծիքով քրեական գործի հարուցումն այս պարագայում «անօրինական» է, քանի որ այստեղ հանցագործություն չկա․ «Հայկ Օհանյանը 21 տարի բանակում է ծառայել, որպես սպա, ինժիներ է եղել, հրթիռավար, նորմալ մարդ է։ Համոզված եմ, որ գործը ներողության է հասնելու եւ դրանով ավարտվելու է։ Ես իր փոխարեն ասում եմ, որ նա ներողություն կխնդրի, ես էլ կխնդրեմ»։
Հիշեցնենք, որ Medialab.am կայքի խմբագրությունը հայտնում է՝ կայքի խմբագիրը Facebook սոցիալական ցանցի մի օգտատիրոջից լուրջ սպառնալիք է ստացել օրերս լրատվամիջոցում հրապարակած ծաղրանկարն է՝ ՀՀ պաշտպանության նախարարության կողմից 2017թ. դեկտեմբերին 7 միլիոն դրամի ծաղիկ գնելու ու բանակում կոռուպցիոն ռիսկերի վերաբերյալ։
Կայքի խմբագրին սպառնացողն ակնարկել է, որ Medialab.am-ը կարող է արժանանալ 2015թ. հունվարին ահաբեկչական հարձակման ենթարկված ֆրանսիական «Շառլի Էբդո» պարբերականի ճակատագրին։
Այդ առնչությամբ ոստիկանությունում նյութեր են նախապատրաստվել, այնուհետև նախապատրաստված նյութերով՝ 2018 թվականի փետրվարի 6-ին ՀՀ գլխավոր դատախազությունում հարուցվել է քրեական գործ՝ ՀՀ քրեական օրենսգրքի 137-րդ հոդվածի 1-ին մասի հատկանիշներով, որը փետրվարի 9-ին վարույթ է ընդունել ՀՀ ՔԿ հատկապես կարևոր գործերի քննության գլխավոր վարչության ՀԿԳ ավագ քննիչը։