Գնաճի խնդրի լուծման համար պարզապես անհրաժեշտ է բարձրացնել բնակչության եկամուտները: Այս մասին ԱԺ տնտեսական հարցերով մշտական հանձնաժողովի նիստի ժամանակ «Ելք» դաշինքի՝ «Հարկային օրենսգրքում փոփոխություններ կատարելու մասին» օրինագծի քննարկման ժամանակ, դիմելով ՀՀ ֆինանսների փոխնախարարին, ասաց «Ծառուկյան» խմբակցության անդամ Միքայել Մելքումյանը:
Միեւնույն ժամանակ նա նշեց, որ կողմ չէ այն տեսությանը, թե ՀՀ ֆինանսների նախարարությունն է մեղավոր գնաճի հետ կապված բոլոր խնդիրների համար: «Բայց դուք մարդկանց փակուղու առաջ եք կանգնեցրել: 2015 թվականից դուք չեք բարձրացնում ո՛չ աշխատավարձները, ո՛չ թոշակները եւ դեռ հայտարարում եք, որ մինչեւ 2020 թվականը նման բան չի նախատեսվում»,- նշեց Մելքումյանը:
Պատգամավորը նաեւ ընդգծեց, որ օտարերկրյա ներդրողներն իրենց բիզնեսի զարգացման մասով երկրում որեւէ լուրջ հեռանկար չեն տեսնում եւ չեն պատրաստվում ապարդյուն ռիսկի դիմել՝ անհեռանկար ձեռնարկության մեջ զգալի գումարներ ներդնելով, քանի որ շատ լավ հասկանում եւ տեսնում են հայկական շուկայի սահմանափակ հնարավորություննրը եւ քաղաքացիների վճարունակության ցածր մակարդակը: Քաղաքացիներն իրենց հերթին, խորապես հիասթափված պետության վարած ներքին քաղաքականության մեջ, իրենց սոցիալական եւ ֆինանսական խնդիրների լուծման այլ ճանապարհ են ընտրում՝ արտագաղթը: Սակայն, ինչպես կարծում է պատգամավորը, ՀՀ կառավարությունը քաղաքացիների սոցիալական մակարդակը բարձրացնելու փոխարեն, ինչը կնպաստեր հարկադրման արդյունավետության բարձրացմանը, որոշել է վերջնակետին հասցնել բնակչության սոցիալապես անապահով խավին:
Նշենք, որ այս հարցը կքննարկվի նաեւ փետրվարի Ազգային ժողովի՝ փետրվարի 16-ի նիստին: