ՌԴ վարչապետ Դմիտրի Մեդվեդեւը խոստացել է հանձնարարել պարզել Թաթարստան չոր կաթի մատակարարումների հետ կապված իրավիճակը, որոնց պատճառով բնական կաթի գներն նվազել են: Նա նաեւ կասկած է հայտնել Եվրասիական տնտեսական միության (ԵԱՏՄ) շրջանակներում գոյություն ունեցող մի շարք տնտեսական սկզբունքների նպատակահարմարության հետ կապված, որոնք եւ հանգեցրել են նման իրավիճակի, փոխանցում է «ՏԱՍՍ»-ը:
«Ես հանձնարարական կտամ պարզել այս իրավիճակը: Մենք ամեն դեպքում պետք է զարգացնենք մեր սեփական կաթնամթերքի արդյունաբերությունը», - ասել է վարչապետը՝ մեկնաբանելով Թաթարստանի ղեկավար Ռուստամ Միննիխանովի՝ մարզպետների հետ հանդիպման ժամանակ հնչեցված բողոքները: Թաթարստանի ղեկավարը դժգոհել է կառավարության ղեկավարին, որ նախորդ տարի տարածաշրջանում լայնորեն հայտնի կաթնամթերքի գները մեկ լիտրի համար նվազել են 5-7 ռուբլիով: Ըստ Միննիխանովի՝ դրա պատճառը ներմուծվող կաթի փոշին է:
«Այո, մենք մեր ընկերների, Եվրասիական միության գործընկերների հետ միասնական շուկա ունենք: Ավելին, ստորագրված համաձայնագրի համաձայն մենք չենք կարող այն սահմանափակել, բայց, ի վերջո, պետք է մտածենք մեր քաղաքացիների մասին: Իսկապես, եթե մենք փաստացիորեն արգելափակում ենք նորմալ կաթի մատակարարումը եւ շուկան բացում ենք չոր կաթի համար՝ միայն տնտեսական սկզբունքներին համապատասխանելու համար, ապա մեր ինչի՞ն են պետք այդ սկզբունքները: Պարզապես պետք է մտածել, թե ինչպես դուրս գալ այս իրավիճակից»,- մեկնաբանել է Մեդվեդեւը: