Իսրայելը չափազանց հետաքրքրված է Հայաստանում ազատ տնտեսական գոտու ստեղծմանն իր մասնակցությամբ: Այս մասին փետրվարի 16-ին Հայաստան-Իսրայել բարեկամության խորհրդարանական խմբի անդամների մամուլի ասուլիսի ժամանակ ասաց հայկական պատվիրակության անդամ, ՀՀԿ խմբակցության քարտուղար Գագիկ Մելիքյանը:
Նրա խոսքով՝ իսրայելական կողմը, հաշվի առնելով Հայաստանի անդամակցությունը Եվրասիական տնտեսական միությանը, հանդես է եկել բավական ինտրիգային եւ հետաքրքիր հայտարարությամբ: «Նրանք ցանկանում են մասնակցել Հայաստանում ազատ տնտեսական գոտու ստեղծման գործընթացին եւ այդ գոտում ակտիվ տնտեսական գործունեություն սկսել»,- նշեց Մելիքյանը:
Նշենք, որ Իսրայելում հայկական պատվիրակությունը ղեկավարել է հանրապետական պատգամավոր Գագիկ Մինասյանը: Պատվիրակության կազմում են եղել նաեւ ընդդիմության ներկայացուցիչները՝ «Ծառուկյան» դաշինքից Վահե Էնֆիաջյանը եւ «Ելք» դաշինքից Գեւորգ Գորգիսյանը: