Ադրբեջանը կարող է բելառուսական զենքի նշանակալի գնորդ լինել: Այսպիսի կարծիք է հայտնել բելառուս ռազմական վերլուծաբան Սերգեյ Մարցելյովը՝ Բելառուսի նախագահ Ալեքսանդր Լուկաշենկոյի հայտարարության համատեքստում, որը Ռուսաստանին մեղադրել է, որ ՀԱՊԿ իր դաշնակիցներին մենակ է թողնում համաշխարհային մարտահրավերների դեմ:
Նրա կարծիքով՝ Բելառուսի առաջնորդի աղմկոտ հայտարարությունը կարող է նաեւ այլ պատճառ ունենալ՝ կապված Կովկասի իրադրության հետ, որտեղ խաչվում են ռուսաստանցի եւ բելառուսցի զինագործների շահերը: Ռուսաստանը զենք է մատակարարում ՀԱՊԿ անդամ Հայաստանին եւ հայերի (Ղարաբաղի պատճառով) բազմամյա հակառակորդ Ադրբեջանին: Երեւանում Ռուսաստանի դիրքորոշումը քննադատում են:
Նրա խոսքով՝ Ադրբեջանից գնորդները պատրաստ են ձեռք բերել բելառուսա-չինական «Պոլոնեզ» համազարկային կրակի ռեակտիվ համակարգեր, անցյալ տարվա հոկտեմբերին Ադրբեջանի պաշտպանության նախարար Զաքիր Հասանովը գնման պայմանները քննարկել է ՄԻնսկ այցելության ժամանակ: Բաքվում հակակշիռներ են որոնում Հայաստանին ռուսական «Իսկանդեր» օպերատիվ մարտավարական հրթիռային համալիրների մատակարարումից հետո։
Դրա հետ մեկտեղ, Մոսկվայի եւ Վաշինգթոնի միջեւ հակասությունների սասկացման ֆոնին Լուկաշենկոյի քննադատությունը կարող են լսել եւ աջակցել Աստանայում ու Երեւանում: Միանգամայն հնարավոր է, որ դաշնակիցները կհամաձայնվեն չեզոք գտնվել, եթե միայն Ռուսաստանը որոշի նրանց արտաքին մարտահրավերներին ընդդեմ սպառազինել արտոնյալ պայմաններով: Պահանջներից մեկը կարող է լինել ռազմական հակամարտություններում ՀԱՊԿ գործընկերների «մարտական մկրտությունը», որտեղ Ռուսաստանը, այսպես թե այնպես, շահեր ունի, կարծում է փորձագետը:
Մինչդեռ մեկ ուրիշ բելառուս փորձագետ հերքել է Բելառուսից Ադրբեջանի կողմից «Պոլոնեզ» կայանքների գնման մասին տեղեկությունը: