Հետխորհրդային տարածքում կիբերհարձակումներից պաշտպանվելու պատշաճ պետական կարգավորում չկա: Այս մասին NEWS.am-ի թղթակցի հետ զրույցում «Հայացք ֆինանսական անվտանգության» թեմայով սեմինարից հետո ասել է «Կասպերսկու լաբորատորիայի» խորհրդատու, վերլուծաբան Բուլատ Սիրաեւը:
Նա նշել է, որ վերջերս Ռուսաստանում հայտնվել է երկրի բոլոր ռազմավարական կարեւորագույն ձեռնարկություններում կիբեր հարձակումների հայտնաբերման եւ դրանց դեմ պայքարի համակարգի ներդրման մասին դաշնային օրենք:
«Հետխորհրդային տարածքի շատ երկրներում նման նախաձեռնություն չկա, եւ ընկերությունները պաշտպանության համար կամ որեւէ քայլեր են ձեռնարկում, կամ ոչ», - ասել է Բուլատ Սիրաեւը:
Նրա խոսքով՝ շատ ընկերություններ ուշադրություն չեն դարձնում կիբեր պաշտպանությանը, քանի որ կամ նրանք չեն ենթարկվել հարձակումների կամ պետական պահանջներ չկան: «Նախ պետք է լինեն ոլորտի ստանդարտներ, օրենքներ, որոնք պարտադրում են ընկերություններին կիրառել առնվազն նվազագույն պաշտպանական տեխնոլոգիաները», - ասել է «Կասպերսկու լաբորատորիա»-ի վերլուծաբանը:
Հիշեցնենք, որ «Կասպերսկու լաբորատորիան» փետրվարի 16-ին կազմակերպել էր «Հայացք ֆինանսական անվտանգության» թեմայով սեմինար: