Արմեն Սարգսյանն այսօր հանդիպել է նախագահ Սերժ Սարգսյանին ու հայտնել որոշման մասին. համաձայն է իշխող ՀՀԿ-ի կողմից Հայաստանի 4-րդ նախագահի թեկնածու առաջադրվել: Վստահեցրել է, որ ընտրվելու դեպքում ամբողջ էությամբ ու եռանդով տրվելու է այդ շատ պատասխանատու գործին: Սերժ Սարգսյանն էլ նշել է, որ ուշադիր հետեւել է Արմեն Սարգսյանի հանդիպումներին: Նախագահը գոհ է դրանցից. հանդուրժողականության եւ երկխոսության պատրաստակամություն է նկատել: Սերժ Սարգսյանը կրկին հույս է հայտնել, որ Ազգային ժողովում Հայաստանի 4-րդ նախագահի ընտրությունը տեղի կունենա համերաշխության պայմաններում: Հիշեցնենք, որ նախագահի ընտրությունը կայանալու է մարտի 2-ին: Առաջին իսկ փուլով ընտրվելու համար Արմեն Սարգսյանը պետք է 79 պատգամավորի կողմ ձայնը ստանա:
Ազգային ժողովի պետաիրավական հարցերի հանձնաժողովի նախագահ Հրայր Թովմասյանն այսօր հրաժարական է ներկայացրել: Թովմասյանը տեղափոխվելու է Սահմանադրական դատարան. նախ՝ որպես անդամ, իսկ հետո կառաջադրվի ՍԴ նախագահի պաշտոնում: Հիշեցնենք, որ գործող նախագահ Գագիկ Հարությունյանի պաշտոնավարման ժամկետը լրանալու է մարտի 23-ին: Այդ պաշտոնում Հարությունյանին փոխարինելու տեղեկությունը, սակայն, Հրայր Թովմասյանը դեռեւս չի հաստատում: Լրագրողների հետ զրույցում Թովմասյանն ասել է՝ պատրաստվում է գնալ ու գլուխը կախ աշխատել:
«Ելք»-ի նախաձեռնությամբ այսօր թանկացումների թեմայով Ազգային ժողովի արտահերթ նիստ էր հրավիրվել: Օրակարգում մեկ հարց էր՝ Հարկային օրենսգրքում փոփոխությունների մասին օրինագիծը: «Ելք-ն առաջարկում է, մասնավորապես, վերադառնալ բենզինի եւ դիզվառելիքի ակցիզային հարկի նախկին դրույքաչափերին, ինչպես նաեւ նվազեցնել մինչեւ 150 հազար դրամ աշխատավարձ ստացողների համար եկամտային հարկը: Նիկոլ Փաշինյանը խոսել է գնաճի մասին՝ նշելով դրա վրա ազդող գործոնները. միջազգային շուկայում գների վայրիվերումներ, գնաճային սպասումներ եւ ընտրակաշառքների վերադարձ: Որպես վերջին գործոնի օրինակ՝ նա մատնանշել է շաքարավազի շուկայում տիրող իրավիճակը:
Նաիրա Զոհրաբյանն էլ առաջարկում է պատասխանատվության ենթարկել Ազգային վիճակագրական ծառայությանը կամ այն պաշտոնյաներին, որոնք ապատեղեկատվություն են տրամադրում վարչապետին 2.6 տոկոս գնաճի մասին: Նա գնաճի մասին կառավարության վերլուծությունից առանձնացրել է BMW-ի «ֆառերի» գների նվազման մասին կետն ու գնաճի նման հաշվարկը պրիմիտիվ, էժանագին մանիպուլյացիա որակել: Իսկ այն տնտեսագետներին, որոնք կկարողանան վերջապես հաշվարկել նվազագույն սպառողական զամբյուղը, Նաիրա Զոհրաբյանը խոստանում է Նոբելյան մրցանակի ներկայացնել:
Խորհրդարանը, ի վերջո, 38 դեմ, 35 կողմ ձայներով մերժել է Հարկային օրենսգրքում առաջարկվող փոփոխությունները: Օրինագծին դեմ են քվեարկել ՀՀԿ-ն ու ՀՅԴ-ն, կողմ՝ «Ելք» ու «Ծառուկյան» խմբակցությունները:
Ազգային ժողովում չեն շրջանցել նաեւ օրեր առաջ Երեւանի ավագանու նիստում տեղի ունեցած միջադեպի թեման: Նիկոլ Փաշինյանը հայտարարել է, որ նախկին պատգամավոր Առաքել Մովսիսյանը՝ «Շմայսը», զանգահարել է ավագանու իրենց խմբակցության անդամ Ալեն Սիմոնյանին եւ սպառնացել: Պատճառը ավագանու նիստում տեղի ունեցած ծեծկռտուքի մասին Սիմոնյանի մեկնաբանությունն է:
Երեւանում տեղի ունեցած ողբերգական դեպքից նոր մանրամասներ են հայտնի: Դատաբժիշկները հայտնել են, որ Դավթաշենի կամրջի տակ հայտնաբերված 37-ամյա կինն ու 9-ամյա աղջիկը մահացել են դիերը հայտնաբերելուց 48 եւ ավելի ժամ առաջ, կամրջից ընկնելու հետեւանքով ստացած բազմաթիվ վնասվածքներից: Գայանե Հարությունյանին ու նրա դստերը որպես անհետ կորած որոնում էին փետրվարի 13-ից:
Քրեական գործով պարզվել է, այդ օրը երեկոյան կինը դստեր հետ գնացել է «Տաշիր պիցցա»-ի Դավթաշենի մասնաճյուղ, պիցցա պատվիրել, վերցրել պատվերն ու հեռացել: Իրավապահները փորձում են հարակից տարածքի արտաքին տեսանկարահանող սարքերի միջոցով պարզել նրանց երթուղին: Հարեւանները մեր թղթակցին պատմել են, որ փետրվարի 13-ին Գայանեն հորն ասել է, որ երեխայի հետ խանութ է գնում. մայր ու աղջիկ դուրս են եկել տանից ու չեն վերադարձել: Հայտնի է նաեւ, որ Գայանե Հարությունյանն ԱԻՆ-ում է աշխատել: Կինն ամուսնալուծված է եղել, դստերը թույլ չի տվել շփվել նախկին ամուսնու ընտանիքի հետ, քանի որ, ըստ տեղեկությունների, նրանք աղանդի հետեւորդ են, եւ մայրը չի ցանկացել, որ մանկահասակ դուստրն ազդեցության տակ ընկնի:
Արմավիրի մարզպետի խորհրդական Մանուկ Սիմոնյանի եղբայրը պնդում է, որ եղբոր սպանությունը եղել է խմբակային, կազմակերպված: Այսօրվա դատական նիստում Արամ Սիմոնյանը դատարանին դռնփակ նիստ անցկացնելու միջնորդություն է ներկայացրել: Տուժողի իրավահաջորդը նշել է, որ նշվելու են անուններ եւ չի ցանկանում, իր խոսքով, որոշ մարդկանց «տուն քանդել»: Նա նաեւ դատարանին սկավառակ է ներկայացրել՝ վստահեցնելով, որ այն հետազոտելուց հետո քրեական գործի վերաբերյալ շատ բան կբացահայտվի: Արամ Սիմոնյանը նաեւ հայտարարել է, որ նախաքննության ընթացքում վկաները սուտ մատնություն են տվել, որոնք դատական պրոցեսի ընթացքում եւս բացահայտվելու են: Դատարանը հետաձգել է Սիմոնյանի միջնորդության քննարկումը: Միաժամանակ, դատարանը բավարարել է սպանվածի կնոջ՝ ամբաստանյալ Ռուզաննա Մկրտչյանի նկատմամբ կրկնակի դատահոգեբանական փորձաքննություն անցկացնելու մասին նրա պաշտպանի միջնորդությունը: Նախորդ նիստին ամբաստանյալը հայտարարել էր, որ իրեն մեղավոր չի ճանաչում աջադրված մեղադրանքում:
Հարավային Կորեայում անցկացվող ձմեռային Օլիմպիական խաղերում ելույթն ավարտեց նաեւ Միքայել Միքայելյանը: 18-ամյա դահուկորդն այսօր հանդես է եկել 15 կմ դասական ոճում՝ զբաղեցնելով 83-րդ տեղը: Փետրվարի 13-ին էլ Միքայելյանը դահուկավազքի սպրինտում գրավել էր 72-րդ տեղը: Փհենչհան 2018-ում երեկ ելույթն ավարտեց նաեւ Հայաստանի միակ կին ներկայացուցիչ Կատյա Գալստյանը: Իսկ Հայաստանի վերջին ներկայացուցիչ Աշոտ Կարապետյանը հանդես կգա միայն լեռնադահուկային սպորտի հատուկ ոլորավայրէջքում՝ փետրվարի 22-ին:
Հենրիխ Մխիթարյանը՝ «Արսենալ»-«Էստերսունդ» հանդիպման լավագույն ֆուտբոլիստ: Քվեարկությունն անցկացվել է անգլիական ակումբի պաշտոնական կայքում: Արդյունքում Հայաստանի հավաքականի կիսապաշտպանը ճանաչվել է շվեդական ակումբի դեմ Եվրոպայի լիգայի 1/16 եզրափակիչի առաջին խաղի լավագույն ֆուտբոլիստ: Հայաստանի հավաքականի ավագը ստացել է ձայների 63 տոկոսը՝ առաջ անցնելով այդ խաղում գոլի հեղինակ դարձած Մեսութ Օզիլից: Հիշեցնենք, որ Շվեդիայում կայացած խաղում «Արսենալը» հաղթել է 3։0 հաշվով, իսկ Մխիթարյանը մեկնարկային կազմում հանդես է եկել 84 րոպե եւ դարձել 2 գոլային փոխանցման հեղինակ:
Փետրվարի 16-ին դոլարը շարունակել է թուլանալ, եվրոն՝ ամրապնդել դիրքերը: Դոլարի փոխարժեքը կազմել է 480 դրամ, եվրոյինը՝ 602, ռուբլունը՝ 8 դրամ 53 լումա, ֆունտինը՝ 678 դրամ:
Փետրվարի 17-ին հանրապետությունում սպասվում է առանց տեղումների եղանակ, 18-ին շրջանների զգալի մասում տեղումներ կլինեն: Օդի ջերմաստիճանը 18-ի գիշերը կբարձրանա 4-5 աստիճանով, ցերեկը՝ նույնքան կնվազի: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +2+4, ցերեկը՝ +14+16 աստիճան տաքություն: