Անկախ երկրում տիրող բարդ սոցիալ-տնտեսական իրավիճակից, հայ ժողովուրդը պետք է արժանապատվորեն նշի Ղարաբաղյան շարժման 30-ամյակը: Փետրվարի 17-ին՝ լրագրողների հետ հանդիպման ժամանակ այսպիսի կարծիք է հայտնել պատմաբան, հրապարակախոս Արմեն Կարապետյանը:
Նրա խոսքով՝ հայ ժողովրդի պատմության մեջ այնքան շատ իրադարձություններր կան, որոնք կարելի է եւ նույնիսկ պետք է նշել: «Պետք է ասել, որ Ղարաբաղյան շարժման շնորհիվ Հայաստանը եւ Լեռնային Ղարաբաղն անկախություն ձեռք բերեցին: Եվ դա պետք է հիշել եւ գնահատել »,-պարզաբանել է Կարապետյանը:
Միաժամանակ պատմաբանը նշել է, որ այդ իրադարձությունները ոչ մի կերպ կապված չեն Ղարաբաղյան շարժման եւ Հայաստանի անկախացումից հետո առաջացած բացասական հետեւանքների հետ: Միեւնույն ժամանակ, նա ընդգծել է, որ բոլոր ձեռքբերումները հարցականի տակ են, իսկ Ղարաբաղը կարող է դիմակայել Ադրբեջանին միայն Հայաստանի ամրապնդման դեպքում:
Բացի այդ, Ադրբեջանում, նրա խոսքով, լավ գիտեն Հայաստանում գոյություն ունեցող բոլոր խնդիրների մասին, եւ Բաքվում ուշադիր հետեւում են Հայաստանում տեղի ունեցող զարգացումներին, որպեսզի իրենց համար հարման իրավիճակում օգտվեն Հայաստանի թուլությունից։
«Եթե Հայաստանը թույլ լինի, նրա դիրքերը բանակցային գործընթացում եւս կթուլանան»,-նկատել է հրապարակախոսը։ Նրա կարծիքով՝ հայկական կողմի դիրքերին ամենից ուժեղ հարվածը միգրացիոն գոչծընթացն է հասցնում։
Իր հերթին «Կոռնիձոր» ջոկատի հրամանատար Արա Խուդավերդյանը նշել է, որ ղարաբաղյան շարժման շնորհիվ, ռազմական պայմաններում, սկսվել է հայկական կանոնավոր բանակի ձեւավորման գործընթացը: Սակայն, ըստ ջոկատի հրամանատարի, Հայաստանի իշխանությունները հետագայում Ղարաբաղյան շարժման բոլոր հաջողությունները եւ ձեռքբերումները ոչնչի հավասարեցրեցին: Նախկին կամավորը նաեւ դեմ է բանակցային գործընթացին՝ համարելով դա անիմաստ: