«Լուսավոր Հայաստան» կուսակցության առաջնորդ Էդմոն Մարուքյանը դեռեւս չի ուսումնասիրել հարցը, որ մեծ Բրիտանիայում դեսպան Արմեն Սարգսյանին Ազգային ժողովի ընտրության միջոցով նախագահ դարձնելու ՀՀԿ ղեկավարության մտադրությունը հակասահմանադրական է։

«Մինչեւ հիմա դա վիճարկող չի եղել, առաջին անգամ են ասում, պետք է նայենք, մինչեւ հիմա բազմաթիվ հարցեր մենք ենք վիճարկել, որը արդյունավետ հետեւանք չի ունեցել»,–ասաց էդմոն Մարուքյանը՝ շեշտելով, որ եթե տեսնեն՝ անելիք կա, կքննարկեն հետագա քայլերը։

«Եթե ինչ–որ անելու բան լինի, ոչ «Լուսավոր Հայաստանը», ոչ էլ «Ելք» դաշինքը չի թողնի, որ այդպես մնա»,-վստահեցրեց Մարուքյանը:

Նշենք, որ 2015–ին փոխված Սահմանադրության համապատասխան դրույթները  ilur.am–ի հետ զրույցում  մեկնաբանել է  փաստաբան  Վահե Գրիգորյանը՝ նշելով, որ ԱԺ-ի կողմից նախագահ ընտրելու գործընթացը հակասահմանադրական է։  Ըստ Վահե Գրիգորյանի՝ ԱԺ-ի միջոցով նախագահ ընտրելու, ինչպես եւ այլ բազմաթիվ դրույթներ ուժի մեջ են մտնում միայն նորընտիր Հանրապետության նախագահի կողմից իր պաշտոնի ստանձնման օրը։ Այսինքն՝ ստացվում է, որ մինչ այդ 4–րդ նախագահը պետք է ընտրվի համապետական ընտրությամբ։