Փարիզը Լոնդոնի հետ ռազմական համագործակցության շարունակություն է ակնկալում, չնայած Բրիտանիայում Եվրամիությունից դուրս գալու մասին (Brexit) հանրաքվեի արդյունքներին: Այս մասին շաբաթ Մյունխենի անվտանգության կոնֆերանսում հայտարարել է Ֆրանսիայի վարչապետ Էդուարդ Ֆիլիպը, հաղորդում է ՏԱՍՍ-ը:
«Չնայած Brexit-ին՝ մենք ակնկալում ենք, որ շահերի ընդհանրությունը թույլ կտա պահպանել եւ ամրապնդել երկու երկրների միջեւ սերտ կապերը», - ասել է Ֆիլիպը: Նա հիշեցրել է, որ Ֆրանսիայի նախագահ Էմանուել Մակրոնի կողմից ներկայացված եվրոպական օպերատիվ նախաձեռնությունը նպատակ ունի «միջազգային գործողություններին առավել ներգրավված պետությունների բանակների մերձեցմանը»:
«Մեր նպատակն այն է, որ հաջորդ տասնամյակի սկզբին Եվրոպան ունենա միասնական արձագանքման ուժ, ընդհանուր պաշտպանական բյուջե եւ ընդհանուր դոկտրին», - ասել է Ֆրանսիայի վարչապետը:
«Եթե եվրոպական պաշտպանական քաղաքականությունը չլրացվի միջազգային գործողություններում մասնակից պետությունների ավելի ակտիվ ներգրավվամբ, ապա այս ծրագիրը հնարավոր է միայն կոլոքվիումի թեմա դառնա»,-ասել է նա:
Նա նշել է, որ «ֆրանսիական ուժերն այսօր բազմաթիվ միջազգային գործողություններում արյուն են հեղում»:
