Եղվարդ քաղաքի բնակչուհի Լուսինե Ղազարյանը վերջին ամսվա մեջ երեք անգամ բախվել է ժամկետանց սնունդ գնելու խնդրի: NEWS.am-ի հետ զրույցում Լուսինեն պատմեց, որ 2 դեպքում ժամկետանց սնունդը հետ է վերադարձրել, իսկ մի դեպքում չի կարողացել հետ վերադարձնել:
«Երեւանից հավ եմ գնել, ասեցին, որ հենց այդ օրն են ստացել: Քանի որ Եղվարդում եմ ապրում, տարել եմ Եղվարդ տանը բացել եմ եւ այնպիսի գարշահոտություն էր տունը լցվել, որ չէի կարողանում ազատվել այդ հոտից: Հետո այդ հավը գցեցինք շանը, որ ուտի, պատկերացրեք` ինչ աստիճանի փչացած էր, որ նույնիսկ շունը չկերավ այդ հոտած հավը: Դե պատկերացրեք, ոչ միայն ժամկետանց էր, այլ եսիմ ինչ աստիճանի հավելյալ սրսկած հավ է դա եղել»,- ասաց Լուսինեն, նշելով, որ իր գնած հավը հայկական է եղել:
Հաջորդ ժամկետանց սնունդը, որը գնել է Լուսինեն պահածոյացված ձուկն է եղել, որը սակայն հետ է վերադարձրել խանութ:
«Խանութում նայել էի ժամկետը, նորմալ էր, բայց եբ տարա տուն, բացեցի ու տեսա ինչ աստիճանի փչացած է, ավելի ուշադիր նայեցի ժամկետին ու հասկացա, որ ժամկետը փոխել են, տակից իսկական ժամկետն էր գնած»,- ասաց Լուսինեն:
Մյուս ժամկետանց ապրանքը, «Մարիաննա» ապրանքանիշի կաթն է եղել, որը սակայն Լուսինեն չի գնել, ուղղակի տարել է դրամարկղ ու ասել, որ ժամկետանց է: Լուսինեին խանութում ասել են, որ հետեւում դրված կաթը վերցնի, որոնք ժամկետանց են:
Լուսինեին մեզ հետ զրույցում նշեց, որ իրեն զայրացնում է այն փաստը, որ համապատասխան մարմինները ոչ մի վերահսկողություն չեն իրականացնում, թե ինչ մակնշմամբ ապրանքներ են խանութներում վաճառվում:
«Այսինքն գնորդը այնքան ուշադիր պետք է լինի, որ ժամկետանց ապրանք չգնի, բայցվ ամեն անգամ չի ստացվում: Ուր են վերահսկողություն իրականացնող մարմինները, որ նման դեպքեր չգրանցվեն եւ քաղաքացին փչացած ապրանք տուն չտանի»,-ասաց Լուսինեն:
«Մարիաննա» կաթնամթերքի ընկերությունից էլ մեզ պատասխանեցին, որ իրենք ժամկետին մոտենող մթերքները հավաքում են, եւ եթե խանութում ժամկետանց ապրանք է մնում, դա խանութի մեղքն է, քանի որ իրենց առաքիչները չեն կարող այդ ամենը հսկել: