Մյունխենում` ՀՀ նախագահի գլխավորած պատվիրակության կազմում գտնվող Հայաստանի արտաքին գործերի նախարար Էդվարդ Նալբանդյանն այսօր՝ փետրվարի 17-ին, հանդիպել է Եգիպտոսի արտաքին գործերի նախարար Սամեհ Հասան Շուքրիի հետ:
ԱԳՆ-ից NEWS.an-ին հայտնում են, որ արտգործնախարարները գոհունակությամբ շեշտելով, որ հայ-եգիպտական կապերը հիմնված են երկու ժողովուրդների դարավոր պատմամշակութային առնչությունների եւ փոխադարձ համակրանքի վրա՝ կարեւորեցին հայ-եգիպտական բարեկամական հարաբերությունների առավել զարգացման նպատակով հավելյալ քայլերի ձեռնարկումը։
Մտքեր փոխանակվեցին առեւտրատնտեսական կապերի ակտիվացման, իրավապայմանագրային դաշտի ընդլայնան շուրջ, անդրադարձ կատարվեց հայ-եգիպտական միջկառավարական հանձնաժողովի աշխատանքներին:
Հայաստանի եւ Եգիպտոսի արտաքին քաղաքական գերատեսչությունների ղեկավարները կարեւորեցին միջազգային հարթակներում փոխգործակցության ընդլայնումը։
Հայաստանի ԱԳՆ ղեկավարը եգիպտացի գործընկերոջը ներկայացրեց Երեւանում կայանալիք Ֆրանկորֆոնիայի միջազգային կազմակերպության գագաթաժողովի նախապատրաստական աշխատանքները։
Էդվարդ Նալբանդյանի եւ Սամեհ Շուքրիի ուշադրության կենտրում էին միջազգային եւ տարածաշրջանային հրատապ խնդիրները:
Հայաստանի ԱԳ նախարարն իր պաշտոնակցին ներկայացրեց Լեռնային Ղարաբաղի հիմնահարցի բացառապես խաղաղ կարգավորման ուղղությամբ Հայաստանի եւ ԵԱՀԿ Մինսկի խմբի համանախագահ երկրների համատեղ ջանքերը: