Հնդկաստանի Տիեզերական հետազոտությունների կազմակերպությունն (ՀՏՀԿ) այս տարվա ապրիլին նախատեսում է դեպի Լուսին ուղարկել փոքր լուսնագնացով «Չանդրայան -2» առաքելությունը: Այս մասին ԶԼՄ-ներին հայտնել է Հնդկաստանի կառավարությունում ատոմային էներգետիկայի եւ տիեզերքի հարցերով նախարար Ջիթենդրա Սինգհը, փոխանցում է «ՏԱՍՍ»-ը:
Հնդկաստանը պատրաստվում է «Չանդրայան -2»-ը տիեզերք ուղարկել ապրիլին: Այս առաքելությունը հաջորդում է «Չանդրայան-1» առաքելությանը, որի շնորհիվ ՀՏՀԿ-ն Լուսնի վրա ջուր է հայտնաբերել: «Չանդրայան-2» առաքելությունը ծրագրի հետագա զարգացումն է՝ նույնքան կարեւոր, որքան մարդու վայրէջքը Լուսնի վրա»,- NDTV-ն մեջբերում է Սինգհայի խոսքերը:
«Չանդրայան -2»-ը բարդ խնդիր է, քանի որ առաջին անգամ մենք դեպի Լուսին ուղեծիրային մոդուլ, վայրէջքային մոդուլ եւ ինքնագնաց սարք կուղարկենք», - ասել է Սինգհը` հավելելով, որ վայրէջքը նախատեսվում է Լուսնի Հարավային բեւեռի տարածքում:
Եթե Հնդկաստանը հաջողության հասնի, դա մեծ նվաճում կլինի ՀՏՀԿ-ի համար, որի բյուջեն ՆԱՍԱ-ից գրեթե 20 անգամ պակաս է: «Չանդրայան -2» նախագծի ընդհանուր արժեքը 8 մլրդ ռուպի է (մոտ 125 մլն դոլար):