ՀՀ 4-րդ նախագահի պաշտոնում ՀՀԿ-ի կողմից առաջադրված Արմեն Սարգսյանի թեկնածության վերաբերյալ դեռեւս քննարկում չի եղել «Ծառուկյան» խմբակցությունում: Այս մասին NEWS.am-ի հետ զրույցում ասաց «Ծառուկյան» խմբակցության պագամավոր Նաիրա Զոհրաբյանը:
«Դեռեւս քննարկում չի եղել խմբակցությունում այս հարցի շուրջ: Մենք հանդիպել ենք Արմեն Սարգսյանի հետ, լսել ենք իր տեսլականը, մոտեցումները, նա նաեւ պատասխանել է մեր պատգամավորների հարցերին: Դրանից հետո Արմեն Սարգսյանը հանդիպել է նաեւ մեր կուսակցության ղեկավար Գագիկ Ծառուկյանին: Արմեն Սարգսյանի ընտրությունը մարտի 2-ին է, կարծում եմ` դեռ բավականաչափ ժամանակ կա: Մենք պարոն Ծառուկյանի գլխավորությամբ կհավաքվենք եւ մեր որոշումը լրատվամիջոցներին կներկայացնենք»,- ասաց պատգամավորը:
Նաիրա Զոհրաբյանը հավելեց, որ առաջիկա 3 օրերի ընթացքում խմբակցության նիստ չի նախատեսվում:
Ավելի վաղ հայտնել էինք, որ Արմեն Սարգսյանն ընդունել է ՀՀ նախագահ Սերժ Սարգսյանի առաջարկը՝ առաջադրվել որպես ՀՀ 4-րդ նախագահի թեկնածու: Ազգային ժողովի 4 կուսակցություններից 3-ի՝ ՀՀԿ-ի, ՀՅԴ-ի և «Ելքի» հայտնել են իրենց դիրքորոշումները Արմեն Սարգսյանի թեկնածության վերաբերյալ: Նրանցից միայն «Ելքն» է դեմ քվեարկելու Արմեն Սարգսյանի թեկնածությանը:
ՀՀ 4-րդ նախագահի ընտրությունը տեղի կունենա մարտի 2-ին: