Ադրբեջանի նախագահ Իլհամ Ալիեւի հայտարարությունը Երեւանը գրավելու մասին պետք է լուրջ ընդունել եւ պատրաստվել լայնամասշտաբ ռազմական գործողությունների: Այս մասին NEWS.am-ի հետ զրույցում ասաց պահեստազորի գնդապետ Վոլոդյա Ավետիսյանը` անդրադառնալով Ադրբեջանի նախագահ Իլհամ Ալիեւի ռազմատենչ ելույթինն իշխող «Ենի Ազերբայջան» կուսակցության 6-րդ համագումարում, որտեղ նա հայտարարել էր, թե Ադրբեջանի քաղաքական եւ ռազմավարական նպատակը Երեւանը վերադարձնելն է՝ նշելով, որ այն «իրենց պատմական տարածքն է»:
«Ես շատ լուրջ եմ ընդունում Ալիեւի հայտարարությունը, քանի որ դա կատակ չէ, նա իր սրտի ցանկությունն է հայտնում ի օգուտ մեզ, ասելով` պատրաստվեք, որ հարձակվելու ենք, մեր նպատակը Հայաստանը գրավելն է: Այդ առումով Ալիեւը մեր կողմից է խոսում, բայց մեր իշխանությունները չեն հասկանում, որ պետք է ամեն պահի պատրաստ լինեն լայնամասշտաբ ռազմական գործողությունների»,- ասաց պահեստազորի գնդապետը:
Վոլոդյա Ավետիսյանի խոսքով` 20 տարուց ավելի Ադրբեջանի զինումը միայն մեկ նպատակ է հետապնդում` այն է լայնածավալ ռազմական գործողություններ Հայաստանի դեմ: «Ադրբեջանը 90-ական թվականներից մինչեւ հիմա անընդհատ զինվում է եւ ռազմական լայնամասշտաբ գործողությունների հավանականությունը շատ մեծ է, որովհետեւ այդ զենքը մի օր պետք է օգտագործվի ոչ միայն Արցախի այլ նաեւ Հայաստանի դեմ: Ուստի իմ կարծիքով` մենք միշտ ամեն րոպե պետք է պատրաստ լինենք լայնամասշտաբ ռազմական գործողությունների ընդդեմ Ադրբեջանի: Պատրաստ ասելով ես հասկանում եմ այն, որ մենք պետք է ոչ միայն կարողանանք պաշտպանել մեր սահմանները այլ նաեւ կարողանանք առաջ գնալ»,- նշեց պահեստազորի գնդապետը:
Անդրադառնալով երկրի տնտեսական վիճակին, Վոլոդյա Ավետիսյանը նշեց, որ երկրի բնակչությունն անընդհատ նվազում է, ինչը պաշտպանական առումով լուրջ խնդիրներ կարող է առաջացնել Հայաստանի համար. «Այսօր ամենավտանգավոր բանն այն է, որ հայ մարդը, քաղաքացին լքում է իր երկիրը, զինվորը գնում է: Ո՞վ է կռվելու պատերազմում` չգիտենք: Հայաստանում ժողովուրդն ու իշխանությունը միմյանց հետ ընդհանրապես կապ չունեն: Իշխանությունը իր համար է ապրում պետական բյուջեն թալանելով, իսկ ժողովուրդն էլ մի կերպ օրվա հացի փող է վաստակում: Պատերազմի դեպքում հայրենասիրություն է հայերին հաղթանակ բերելու եւ այդ պատճառով մեր հույսները պետք է դնենք հայ զինվորի հայրենասիրության վրա»:
