«Ելք» դաշինքի մեջ մտնող կուսակցությունները կընդունեն գիտակցված, այլ ոչ թե արհեստական որոշում միավորվել կամ չմիավորվել մեկ կուսակցության մեջ։ Այս մասին փետրվարի 19-ին՝ լրագրողների հետ հանդիպման ժամանակ հայտարարել է ընդդիմադիր «Ելք» դաշինքի պատգամավոր Մանե Թանդիլյանը։
Նա հիշեցրել է, որ մեկ կուսակցության մեջ միավորվելու նպատակն ամրագրված է դաշինքի ստեղծման հուշագրի մեջ, եւ երեք կուսակցությունները բանակցություններ կվարեն այն հարցի շուրջ, թե ինչքանով է իրականացվել հանրությանը տրված խոստումները: «Ինչ ֆորմատով կաշխատենք հետագայում, կդառնա մեր համատեղ գործունեության տրամաբանական արդյունքը, քանի որ թիմերը պետք է համատեղեն տարբեր խնդիրների լուծման իրենց առանձին հայեցակարգերը ու ճանապարհային քարտեզները», - նշել է պատգամավորը:
Նրա հավաստմամբ, «Ելք» դաշինքում ներառված կուսակցությունները որեւէ տարաձայնություն չունեն սահմանված նպատակների շուրջ, կան ձեռքբերումների շուրջ տարբերվող տեսակետներ եւ կարծիքներ: «Ես շատ ուրախ եմ, որ դաշինքում առողջ բանավեճեր եւ քննարկումներ են ընթանում, դա բնական գործընթաց է, առանց որի լճացում տեղի կունենա», - եզրափակել է Մանե Թանդիլյանը:
Հիշեցնենք, որ «Ելք» դաշինքում ներառված են «Լուսավոր Հայաստան», «Հանրապետություն» եւ «Քաղաքացիական պայմանագիր» կուսակցությունները:
