Իշխանությունները ցանկանում են շատ արագ կրիպտոարժույթի մայնինգի մենաշնորհ մտցնել։ Այս մասին փետրվարի 19-ին՝ լրագրողների հետ հանդիպման ժամանակ հայտարարել է ընդդիմադիր «Ելք» դաշինքի պատգամավոր Մանե Թանդիլյանը։
Նրա խոսքով, «Ելք» դաշինքը մտավախություն ունի, որ ներկա պահին իշխանությունները մայնինգով զբաղվող ընկերություններին եւ անձանց հավաքագրում են մեկ տեղում մյուս քաղաքացիների մայնինգով զբաղվելու հնարավորությունը սահմանափակելու համար։
«Հենց այդ պատճառով էլ մենք ներկայացրել ենք «Թվային տեխնոլոգիաների զարգացման մասին» օրինագիծը, որը նախատեսում է, որ Հայաստանում կրիպտոարտարժույթի շուկան պետք է ազատականացվի, եւ յուրաքանչյուր մեկը, ով ցանկանում է դրանով զբաղվել, կարողանա դա անել», -բացատրել է Մանե Թանդիլյանը:
Կասկածներ կան, որ իշխանությունները փորձում են որոշ օգտատերերի համար սահմանափակել մայնինգին հասանելիությունը՝ մյուս «ընտրյալների» համար արտոնյալ պայմանններ ստեղծելով։
«Մայնինգը կարող է պետության համար լրացուցիչ եկամտի աղբյուր դառնալ, եւ այդտեղ ոչ ոքի առաջ սահմանափակում չպետք է դրվի, եթե ցանկանում ենք, որ շուկան զարգանա», - ասել է Թանդիլյանը:
Միեւնույն ժամանակ նա չի ցանկացել բացել փակագծերը, թե ով եւ ինչպես է ցանկանում կրիպտոարժույթների մենաշնորհը մտցնել, քանի որ դաշինքի անդամների կասկածները հիմնված են ենթադրությունների եւ լուրերի վրա:
Իսկ NEWS.am-ի թղթակցի հարցին` արդյոք իշխանությունները ցանկանում են ստեղծել մայնինգի համար տեխնոպարկ, որտեղ նրանց էլեկտրաէներգիա կվաճառվի արտոնյալ դրույքաչափերով, պատգամավորը պատասխանել է. «Ինչ-որ նման բան ցանկանում են անել»: Միեւնույն ժամանակ, նա չի պատասխանել հարցին, թե որտեղ պետք է կառուցվի տեխնոպարկը՝ նշելով, որ դրանք դեռեւս խոսակցություններ են։