«Աերոֆլոտ» ավիաընկերության բեռնատար ինքնաթիռը, որը Ֆրանկֆուրտ-Հան օդանավակայանից ուղեւրվել էր Բաքու, արտակարգ վայրէջք է կատարել կասկածելի ձայների պատճառով, հաղորդում է haqqin.az-ը: Միջադեպը տեղի է ունեցել փետրվարի 15-ին:
Տեղեկության համաձայն` օդ բարձրանալուց մեկ ժամ անց անձնակազմը պայթյունի նմանվող տարօրինակ ձայներ է լսել։ Օդանավի հրամանատարը որոշել է վերադառնալ Ֆրանկֆուրտ-Հան օդանավակայան։
Ֆրանկֆուրտի օդանավակայանի ներկայացուցիչ Քրիստոֆ Գյոցմանի խոսքով, ինքնաթիռն արտակարգ վայրէջքից հետո մանրակրկիտ ստուգում է անցել, սակայն ոչ մի կասկածելի բան չի հայտնաբերվել: Նա նաեւ հավելել է, որ անվտանգության նկատառումներից ելնելով ինքնաթիռը բեռնաթափվել է, ապա բեռը ետ են լցրել։ Միայն դրանից հետո ինքնաթիռը կրկին ուղղություն է վերցրել դեպի Բաքու: