Հերթական ավազակային հարձակումը Երեւանում: Այսօր հարձակվել են «ՎՏԲ-Հայաստան Բանկ»-ի Բաղրամյան 56 հասցեում գտնվող մասնաճյուղի վրա: Նախնական տեղեկություններով՝ հարձակվողները երկուսն են եղել: Իրավապահների տեղեկացմամբ՝ նրանք եղել են դիմակավորված եւ ատրճանակով զինված: Դեռեւս չճշտված տվյալներով՝ բանկի մասնաճյուղից շուրջ 8.5 մլն դրամի տարբեր արժույթների գումար են հափշտակել: Դեպքի առիթով քրեական գործ է հարուցվել: Նշենք, որ ահազանգը ոստիկանությունում ստացվել է ժամը 16:00-ին:
Աշխատանքային այցով Գերմանիայում գտնվող Սերժ Սարգսյանը մասնակցել է Մյունխենի անվտանգության համաժողովին: Իր ելույթում Հայաստանի նախագահն անդրադարձել է, մասնավորապես, Արցախի հիմնախնդրին ու ադրբեջանական հերթական նկրտումների մասին: Իլհամ Ալիեւը, հիշեցնենք, հիմա էլ Երեւանն է «ադրբեջանական պատմական տարածք» կոչում եւ խոսում այն վերադարձնելու մասին: Սերժ Սարգսյանն այս հայտարարությունը զառանցանք է կոչել: Համաժողովին մասնակցող ադրբեջանցի պատվիրակին էլ Սերժ Սարգսյանը հիշեցրել է, թե որքան կարճ է իր երկրի պատմությունը, եւ որքան երկար՝ Երեւանինը. հոկտեմբերին տոնում ենք Երեւանի հիմնադրման 2800-ամյակը: Ադրբեջանցին հայտարարել է նաեւ, թե արմատներով Ղարաբաղից է եւ հարցրել, թե ե՞րբ կարող է «տուն վերադառնալ»: Սերժ Սարգսյանը պատասխանել է. երբ ձեր ղեկավարությունը հրաժարվի անիրատեսական ակնկալիքներից:
Ինչ վերաբերում է հայ-թուրքական արձանագրություններին. Սերժ Սարգսյանը հիշեցրել է, որ դրանք թղթի վրա մնացին Թուրքիայի առաջնորդների քաղաքական կամքի բացակայության պատճառով: Սա Հայաստանի նախագահը երկու երկրների հարաբերությունները կարգավորելու պատմական հնարավորության տապալում է անվանել:
Իրանում օդանավ է կործանվել: Թեհրան-Յասուջ չվերթն իրականացնող ուղեւորատար օդանավն աղետի է ենթարկվել Սպահան նահանգի Սեմիրոմ քաղաքի մերձակայքում: Օդանավում 60 ուղեւոր եւ անձնակազմի 6 անդամ է եղել: Բոլորը զոհվել են: Իրանում Հայաստանի դեսպանության տեղեկացմամբ՝ կործանված օդանավում հայեր կամ Հայաստանի քաղաքացիներ չեն եղել: Օդանավի բեկորների մի մասն արդեն հայտնաբերել են: Աղետի վայրում լեռնագնացների խումբ է աշխատում, ինքնաթիռի բեկորների եւ զոհվածների որոնումներին մասնակցում է նաեւ բանակը՝ ռազմական ուղղաթիռներով:
Աղետի պատճառը դեռեւս պարզ չէ, սակայն որպես հիմնական վարկած դիտարկվում է անբարենպաստ եղանակը: Ըստ տեղեկությունների՝ օդանավը ռադարներից անհետացել է թռիչքից 50 րոպե անց: Տեղական մամուլը գրում է, որ Aseman Airlines ավիաընկերության կործանված օդանավը 20 տարի առաջ էր արտադրվել, նախկինում տեխնիկական խնդիրների է բախվել. շուրջ մեկ ամիս առաջ այն տեխնիկական անսարքության պատճառով վթարային վայրէջք էր կատարել: Ավիաընկերությունը, սակայն, հերքել է օդանավի տեխնիկական անսարքության մասին տեղեկությունները:
Երեւանի ավագանու նիստում տեղի ունեցած միջադեպի փաստով ոստիկանությունում քրեական գործ է հարուցվել: Քննչական կոմիտեի տեղեկացմամբ՝ գործը հարուցվել է ծեծի եւ խուլիգանության հատկանիշներով: Առաջինի դեպքում նախատեսվում է նվազագույն աշխատավարձի հարյուրապատիկի չափով տուգանք կամ առավելագույնը երկու ամիս ժամկետով կալանք, իսկ խուլիգանության հոդվածով՝ նվազագույն աշխատավարձի հիսնապատիկի չափով տուգանք կամ առավելագույնը մեկ ամիս ժամկետով կալանք: Հիշեցնենք, որ «Երկիր Ծիրանի» խմբակցության անդամներն ավագանու նիստին Նուբարաշենից կոյուղաջրով լի տարա էին տարել: Մարինա Խաչատրյանն այն քաղաքապետին է մոտեցնել, ավագանու հանրապետական անդամները փորձել են արգելել, քաշքշուկ է սկսվել: Ավելի ուշ Մարինա Խաչատրյանը հայտարարել է, թե իր նկատմամբ սեռական ոտնձգություն է կատարվել, ինչի համար ինքն ապտակել է հանրապետական Էդմոնդ Կիրակոսյանին ու պատասխան ապտակ ստացել:
Մինչ այդ, Տարոն Մարգարյանը որոշել է կանոնակարգել քաղաքապետարանում լրագրողների աշխատանքը: Ավագանու նիստում տեղի ունեցած միջադեպից հետո արդեն լուրեր էին շրջանառվում, որ մտադիր են սահմանափակել լրագրողների աշխատանքը՝ քաղաքապետարանում կատարվող աղմկոտ իրադարձությունները հնարավորինս քիչ հանրայնացնելու համար:
Քաջարանում մահացու ծեծի են ենթարկել 53-ամյա տղամարդու: Զոհը Քաջարանի բնակիչ Վալերիկ Մանուչարյանն է, Զանգեզուրի պղնձամոլիբդենային կոմբինատում աշխատում էր որպես մոդելագործ: Հանցագործությունը կատարելու մեջ կասկածվողներն ազգականներ են՝ Կապանի բնակիչներ 23-ամյա Մհեր Մանուչարյանը, 44-ամյա Սասուն Կարապետյանն ու 34-ամյա Արտաշես Հակոբյանը: Նրանք փորձել են հեռանալ Հայաստանից, սակայն Բագրատաշենի մաքսակետից բերման են ենթարկվել եւ ձերբակալվել: Ի դեպ՝ կասկածյալներից մեկը մահացածի եղբորորդին է: Իրավապահների տեղեկություններով՝ տղամարդիկ անձնական հարցերի շուրջ վիճաբանել են, որի ժամանակ էլ ծեծկռտուք է սկսվել, եւ 53-ամյա Մանուչարյանը ստացված մարմնական վնասվածքներից մահացել է:
Կիեւում հայ գործարարի են առեւանգել: Սուրեն Մամյանին շղթայակապ պահել են, իսկ հարազատներից 500 հազար դոլար փրկագին են պահանջել: Գործարարին առեւանգել են փետրվարի 6-ին, իսկ փետրվարի 17-ին արդեն ուկրաինացի իրավապահները պարզել են տուժողի գտնվելու վայրն ու ազատել նրան: Գործարարի խոսքով՝ կասկածյալները, հավանաբար, տեղյակ էին, որ իր որդին ու ազգականներն ամեն ինչ կանեն՝ իրենց պահանջած գումարը հավաքելու եւ վճարելու մասին: Մի քանի անձ կալանավորվել է, իրավապահները փորձում են պարզել հանցագործության մյուս դերակատարներին:
Ահաբեկչություն Դաղստանում. Կիզլյար քաղաքում տղամարդն ուղղափառ եկեղեցում կրակ է բացել Բարեկենդանը տոնող մարդկանց ուղղությամբ: Հարձակման հետեւանքով 5 կին է զոհվել, եւս 5-ը, այդ թվում՝ երկու իրավապահներ, վիրավորվել են: Պաշտոնական աղբյուրների փոխանցմամբ՝ հանցագործը Կիդերո գյուղի 22-ամյա բնակիչ Հալիլ Հալիլովն է: Ռոսգվարդիայի աշխատակիցները գնդակահարել են Հալիլովին: Երիտասարդն անցյալ տարի միացել էր Ռուսաստանում արգելված «Իսլամական պետություն» ահաբեկչական խմբավորմանը, սակայն հատուկ ծառայությունների ուշադրության կենտրոնում մինչեւ հիմա չի հայտնվել: Կատարվածի պատասխանատվությունը ստանձնել է «Իսլամական պետություն»-ը:
Փետրվարի 19-ին դոլարի արժեզրկմանը միացել է նաեւ եվրոն: Դոլարի փոխարժեքն այսօր կազմել է 480 դրամ, եվրոյինը՝ 596, ռուբլունը՝ 8 դրամ 52 լումա, ֆունտինը՝ 673 դրամ:
Փետրվարի 20-ին հանրապետությունում սպասվում է առանց տեղումների եղանակ: Օդի ջերմաստիճանը 20-ի գիշերը 4-5 աստիճանով կնվազի: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի -3-5, ցերեկը՝ +5+7 աստիճան տաքություն: