Ճապոնիայում Sumitomo Forestry ընկերությունը 2041 թվականին նախատեսում է աշխարհի ամենաբարձր փայտե երկնաքերը կառուցել: Այսպիսով նա ցանկանում է նշել իր հիմնադրման 350-ամյակը, հաղորդում է BBC-ն:
Ընկերության հայտարարության համաձայն՝ W350 անվանումով շենքում 70 հարկ կլինի:
Շենքի միայն 10 տոկոսը կկառուցվի պողպատե կառուցվածքով, շինարարությունում կօգտագործվի 180 հազար խորանարդ մետր փայտանյութ: Ընտրվելու են միայն ճապոնական ծառատեսակներ:
Ամբողջ շենքով նախատեսված են պատշգամբներ, որտեղ այգիներ եւ քաղաքային բանջարանոցներ կլինեն:
Ծրագրի արժեքը կկազմի մոտ 600 միլիարդ իեն (5.9 միլիարդ դոլար), որը մոտավորապես երկու անգամ ավելի թանկ է, քան նույն չափի սովորական երկնաքեր կառուցելը:
Աշխարհի ամենաբարձր փայտե շենքը մինչ օրս Վանկուվերում ուսանողական հանրակացարանն է, որը 53 մետր բարձրություն ունի: