Եկատերինբուրգի Չկալովսկու շրջանային դատարանը 4 եւ կես տարվա ազատազրկման է դատապարտել Համբարձում Գրիգորյանին, որը գիշերային ակումբում ծեծկռտուքից հետո ավելի քան ինը տարի թաքնվել էր արդարադատությունից: Ռուսաստանի Դաշնության Ներքին գործերի նախարարության մամուլի ծառայության հաղորդագրության համաձայն, դատարանը 30-ամյա տղամարդուն մեղավոր է ճանաչել Ռուսաստանի Դաշնության Քրեական օրենսգրքի 111-րդ հոդվածի 3-րդ մասի «ա» ենթակետով («Մի խումբ անձանց կողմից դիտավորյալ կյանքի համար վտանգավոր ծանր վնաս հասցնելը»), գրում է  Znak-ը:

Նախաքննական եւ դատական քննության ընթացքում պարզվել է՝ 2007 թվականի հունվարի 20-ին Եկատերինբուրգի Սամալյոտնի փողոցի գիշերային ակումբի այցելուների միջեւ վեճ էր բռնկվել: Արդյունքում, տղամարդկանցից մեկը ստացել էր գանգուղեղային ծանր վնասվածք, որից հետո նա շտապ հոսպիտալացվել էր թիվ 24 քաղաքային հիվանդանոցում:

Սրանից հետո  ոստիկանության  № 13 բաժնի աշխատակիցները կալանավորել էին հանցագործության երկու կատարողների, երրորդին՝ Գրիգորյանին հաջողվել էր թաքնվել։ 2007 թվականի դեկտեմբերին Չկալովսկու շրջանային դատարանը երկուսին դատապարտվել էր 5 եւ կես տարվա ազատազրկման, իսկ պատիժը նրանք պետք է կրեն խիստ ռեժիմի գաղութում:

Գրիգորյանի նկատմամբ դաշնային հետախուզում էր հայտարարվել։ Ավելի ուշ պարզվել է, որ այս ամբողջ ժամանակ նա թաքնվել է Հայաստանում։ 2016 թվականին նա վերադարձել է Եկատերինբուրգ եւ ուղղակի ներկայացել ներքին գործերի տարածքային մարմնին եւ հայտարարել, որ չի մասնակցել ծեծկռտուքին եւ պահանջել հեռացնել իր անունը հետախուզվողների ցանկից։ Գրիգորյանը համոզված է եղել, որ հանցագործության կատարման վաղեմության ժամկետն անցել է, իսկ ընկերներն էլ պատիժը կրել են, ուստի իրեն հնարավոր չի լինի պատասխանատվության ենթարկել։