Ռուսաստանի «Քաղաքացիական նախաձեռնություն» կուսակցության նախագահի թեկնածու Քսենիա Սոբչակը պատասխանել է նախագահի օգնական Վլադիսլավ Սուրկովի «Վալենտինկան բոսորագույն երանգների մեջ» էսսեին։ Պաշտոնյան «Ռուսկիյ պիոներ» ամսագրում հրապարակված հոդվածում հայտարարել էր, որ քաղաքակրթությունն անկում է ապրում ֆեմինիզմի պատճառով, փոխանցում է Lenta-ն։
Իր պատասխան «Միմոզայի գույնի փիլիսոփայությունը» էսսեն Սոբչակը սկսում է ֆրանսիական գրող Ֆրանսուազ Սագանի խոսքերով․ «Աստված սկզբում արարել է Ադամին, ես էլ եմ միշտ սկսում սեւագրից»։
Սոբչակը խոստովանել է, որ բարդ քաղաքական իրավիճակում կանայք սկսել են պատասխանատու պաշտոններ ստանալ, բայց բացատրում է դա «ջրափոսերի մաքրման» անհրաժեշտությունը «հատկապես տղամարդկային էգոների ոչ խելամիտ եւ ավերիչ բախումներից» հետո։ Հեղինակը որպես օրինակ է բերում կայսրուհի Եկատերինա Մեծի, քաղաքական գործիչներ Գոլդա Մեյերի (Իսրայել) եւ Մարգարետ Թետչերի (Մեծ Բրիտանիա) գործունեությունը եւ ընդգծում, որ կանանց կառավարումից հետո երկրները «միայն առողջանում» էին։
Հեռուստահաղորդավարուհին նախագահի օգնականին մեղադրում է «գորշ սեքսիզմի» մեջ եւ խոստովանում, որ հիասթափվել է, որ այսպիսի խոսակցություններն ընթանում են մի երկրում, որտեղից 55 տարի առաջ տիեզերք է թռչել Վալենտինա Տերեչկովան։ Սոբչակը նաեւ խոստանում է, որ կանանց ապստամբություն չի լինի, բայց կանանց նկատմամբ անհավասարությունը կմնա անցյալում։