Չարբախում մեկ տարի առաջ տեղի ունեցած սպանության գործով այսօր` փետրվարի 20-ին, հետազոտվեցին գործով իրեղեն ապացույցները: Դատարանում հետազոտվեցին գործով իրեղեն ապացույց ճանաչված «Լիա» գեղեցկության սրահի նկուղային հարկում գտնվող սենյակի բազմոցների ծածկոցներն ու գորգերը, սպանված Մուշեղ Մուշեղյանի հագուստը: Այսօր պետք է ուսումնասիրվեին նաեւ իրեղեն ապացույց ճանաչված պարկուճները, լազերային կրիչները: Նախագահող դատավոր Նելլի Բաղդասարյանը նախ ընդմիջում հայտարարեց՝ նշելով, որ դատարանը ընդմիջման ընթացքում կփորձի հայտնաբերել դրանք, այնուհետեւ ընդմիջումից հետո Նելլի Բաղդասարյանը հայտարարեց, որ իրեղեն ապացույցները չեն հայտնաբերվել եւ դատական նիստը հետաձգվում է՝ հասկանալու համար արդյոք այդ ապացույցները դատարան բերվել են, թե ոչ:
Նշենք, որ 2016թ. նոյեմբերի 13-ին տեղի ունեցած հրաձգության հետեւանքով մահացել են 25-ամյա Գեւորգ Ավետիսյանը եւ 30-ամյա Մուշեղ Մուշեղյանը: Պետրոս Իսրայելյանին մեղադրանք է առաջադրվել Քրեական օրենսգրքի 104-րդ հոդվածի 2-րդ մասի 7-րդ կետով, Ալիկ Բանդուրյանին («Նորատուսցի Ալիկ»)՝ Քրեական օրենսգրքի 38-112-րդ հոդվածի 2-րդ մասի 6-րդ կետով, Արմեն Գասպարյանին («Բդո»)՝ Քրեական օրենսգրքի 335-րդ հոդվածի 1-ին մասով:
