Եվրասիական տնտեսական հանձնաժողովի խորհուրդը որոշման նախագիծ է պատրաստել 2020 թվականին արտասահմանից ինտերնետ ծանրոցների առանց մաքսատուրքի ներմուծման շեմի աստիճանական նվազեցման մասին՝ մեկ ուղարկման համար մինչեւ 200 եվրո՝ միաժամանակ մաքսատուրքի տոկոսադրույքի մինչեւ 15 տոկոս նվազմամբ, հայտնել են ՌԴ Ֆինանսների նախարարության մամուլի ծառայությունից, փոխանցում է ՏԱՍՍ-ը:
Ներկայումս Ռուսաստանում թույլ են տալիս արտասահմանյան ինտերնետ խանութներից առանց մաքսատուրքի մինչեւ 1000 եվրո արժեքով ծանրոցների ներմուծում, սակայն ամսական 31 կգ-ի սահմաններում, գերազանցելու դեպքում պահվում է 30 տոկոս մաքսատուրք: Հունվարի 1-ից ուժի մեջ է մտել ԵՏՄ Հարկային օրենսգիրքը, որը անդամ երկրներին պատվիրում է առանց մաքսատուրքի ներմուծման առավելագույն շեմ սահմանել 2018 թվականին 500 եվրո եւ 2019 թվականին 200 եվրո նիշի վրա:
Ինչպես ավելի վաղ հայտնել էր ՌԴ ֆինանսների փոխնախարար Իլյա Տրունինը, ինտերնետ ծանրոցների առանց մաքսատուրքի ներմուծման շեմի նվազեցումը կարող է վճարելիս տեխնիկական խնդիրներ առաջացնել:
Փոխնախարարը նաեւ հայտնել էր, որ ֆիննախը «Ռուսաստանի փոստի» հետ, որին է բաժին ընկնում արտասահմանյան ինտերնետ խանութներից բոլոր ծանրոցների 80 տոկոսից ավելին, համակարգ են ստեղծել, որով ծանրոցները ստանալիս, որոնց արժեքը գերազանցում է շեմը, չի պահանջվում մաքսակետերում առանձին անդորրագիր վճարել, վճարման հնարավորությունը կմտցվի ինտերնետ կայքում պատվերի համակարգի մեջ: Փորձարկումը նախատեսում են սկսել 2018 թվականին: