Հայաստանի իշխող Հանրապետական կուսակցությունից առաջադրված նախագահի թեկնածուի, Մեծ Բրիտանիայի դեսպան Արմեն Սարգսյանի շուրջ բավական լայն քաղաքական կոնսենսուս է ձեւավորվել: Նման կարծիք փետրվարի 21-ին լրագրողների հետ հանդիպման ժամանակ հայտնեց ԱՊՀ երկրների ինստիտուտի տնօրեն, քաղաքագիտության դոկտոր, պրոֆեսոր Ալեքսանդր Մարկարովը:
Նրա խոսքով՝ Արմեն Սարգսյանը մինչ իր թեկնածության առաջադրումը մի շարք խորհրդակցական հանդիպումներ է անցկացրել՝ Հայաստանի եւ Սփյուռքի ներսում քաղաքական տրամադրությունները պարզելու եւ իր թեկնածության շուրջ տարբեր քաղաքական եւ սոցիալական ուժերի, Սփյուռքի եւ Ղարաբաղի կոնսոլիդացման համար: «Արմեն Սարգսյանը ձգտում է քաղաքական ասպարեզում կոնսենսուսի հասել իր թեկնածության շուրջ, ինչի մասին վկայում են նրա հանդիպումներն այլ քաղաքական ուժերի եւ դաշինքների ներկայացուցիչների հետ»,- նշեց քաղաքագետը:
Մարկարովի կարծիքով՝ «Ելք» եւ «Ծառուկյան» ընդդիմադիր դաշինքների ներկայացուցիչների, ՀՀԿ կոալիցիոն գործընկերի եւ ՀՅԴ-ի ներկայացուցիչների հետ հանդիպումները ցույց տվեցին, որ այս երեք խմբակցություններից շատերն են պատրաստ սատարել Արմեն Սարգսյանի թեկնածությունը: «Արմեն Սարգսյանն իրեն որպես քաղաքական-սոցիալական պաշտոնյա է դիրքավորում, որը ոչ միայն մարմնավորում է քաղաքական կոնսենսուսը, այլեւ հասարակության շահերն է ներկայացնում: Նա ինքն է ասել, խորհրդարանական կառավարման ձեւով երկրի ղեկավարը, չնայած իր սիմվոլիկ բնույթին, համապատասխան մշակույթ եւ ավանդույթներ է ձեւավորում»,- ասաց Ալեքսանդր Մարկարովը` հավելելով, որ Արմեն Սարգսյանը կկանգնի հայ հանրության եւ արտաքին դիտորդների առջեւ որպես լայն հանրային աջակցություն ունեցող պաշտոնյա:
Հիշեցնենք, որ առաջին անգամ Հայաստանում նախագահը կընտրվի ոչ թե ժողովրդի, այլ խորհրդարանի կողմից: