«Ելք» դաշինքն ԱԺ-ին առաջարկում է դատապարտել 2008 թվականի մարտի 1-ին հանրահավաքները ցրելու ժամանակ երկրի ղեկավարության եւ ի դեմս Ոստիկանության՝ ուժային կառույցների գործողությունները: Այս մասին փետրվարի 21-ին ԱԺ պետաիրավական եւ մարդու իրավունքների հարցերի մշտական հանձնաժողովի նիստի ժամանակ ասաց «Ելք» դաշինքի ղեկավար Նիկոլ Փաշինյանը:
Նրա խոսքով՝ ԱԺ-ն պետք է հասնի նրան, որ արդարությունը, վերջապես, հաղթանակի, եւ մարդիկ վստահ լինեն, որ երկրում իրենց իրավունքներն իրականում են պաշտպանված, այլ ոչ թե ձեւականորեն: «Երկրում այդ տարիներին իշխանությունների կողմից մասշտաբային քաղաքական հետապնդումներ էին իրականացվում, եւ մեծ թվով մարդիկ հայտնվեցին ճաղերի հետեւում»,- հիշեցրեց Փաշինյանը:
Խմբակցության ղեկավարի կարծիքով՝ սա պետության համար խայտառակ փաստ է, քանի որ երկրում մինչ օրս քաղբանտարկյալներ կան: Դրանից զատ, Փաշինյանը պահանջեց, ի վերջո, պարզել, թե 2008 թվականի հանրահավաքների ընթացքում ինչ հանգամանքներում են սպանվել Հայաստանի 10 քաղաքացիները, քանի որ այս հարցը մինչ օրս անպատասխան է մնում:
Դրա հետ մեկտեղ, ինչպես համարում է ընդդիմադիրը, յուրաքանչյուր քաղաքացի իրավունք ունի փողոց դուրս գալ եւ այս կամ այն քաղաքական հարցերի վերաբերյալ իր կարծիքն ազատ արտահայտել՝ ունենալով նաեւ որոշակի փոփոխություններ ակնկալելու իրավունք, քանի որ հակառակ դեպքում, ինչպես կարծում է Փաշինյանը, քաղաքացիները տեսնելով, որ իրենց հուզող հարցերը չեն լուծվում, կարող են իրենք զբաղվել դրանց լուծմամբ, ինչի իրավունքը նույնպես ունեն:
Նա առաջարկեց հանրահավաքները ցրելիս զոհվածների ընտանիքներին փոխհատուցման վճարման գործընթաց կազմակերպել:
Հիշեցնենք, որ 2008 թվականի մարտի 1-ին իշխանությունը ուժ կիրառեց Երեւանի կենտրոնում ցույց անող ընդդիմության նկատմամբ, զոհվեց 8 ցուցարար եւ ներքին զորքերի 2 զինծառայող։ Մարդկանց զոհվելու համար ոչ ոք այդպես էլ պատասխանատվություն չկրեց։
