Hyundai ընկերությունը ներկայացրել է հաջորդ սերնդի Santa Fe քրոսովերը: Նոր ոճով ստեղծված մոդելը էլեկտրոնային օգնականների ընդլայնված ցանկ ունի եւ 8-աստիճանի ավտոմատ փոխանցման տուփ, փոխանցում է Motor-ը:
Ամենագնացի երկարությունը 4770 մմ է, լայնությունը՝ 1890 մմ, բարձրությունը՝ 1680 մմ, իսկ անվային բազայի չափը հասնում է 2765 մմ-ի: Այսպիսով նոր Santa Fe-ն 80 մմ-ով ավելի երկար է եւ 10 մմ-ով՝ լայն: Բարձրությունը չի փոխվել, սակայն առանցքների միջեւ հեռավորությունը 65 մմ-ով մեծացել է:
Մոդելի կառուցվածքում հիմա ավելի շատ է օգտագործվում բարձր դիմացկունությամբ պողպատ: Նոր Santa Fe-ն ունի 2-լիտրանոց բենզինային շարժիչ՝ 235 ձիաուժ հզորությամբ, 186- եւ 202 ձիաուժ հզորությամբ դիզելային՝ 2,0 եւ 2,2 լիտր տարողությամբ: Քրոսովերը հասանելի է առջեւի եւ ամբողջական հաղորդակով:
Ավտոմեքենան կունենա ճակատային բախման նախազգուշացման, ուղեմասում մնալու, հետընթացով կայանատեղիից դուրս գալու, շրջանաձեւ տեսածիրի, հեռավոր լուսարձակման ավտոմատ կառավարման, վարորդի հոգնածության վերահսկման համակարգեր եւ Rear Occupant Alert գործառույթ, որը հիշեցնում է հետեւի նստատեղին մոռացված երեխաների մասին:
Դրանից բացի, մեքենան կստանա պրոյեկցիոն դիսփլեյ, ադապտիվային կրուիզ, մուլտիմեդիայի համալիր՝ Sound Hound ծրագրով, էլեկտրոնիկայի (Eco, Comfort, Sport եւ Smart) կառավարման աշխատանքի ռեժիմները փոխող համակարգ, ինչպես նաեւ սմարթֆոնով մեքենայի որոշ գործառույթների կառավարման հնարավորություն:
