Մինչեւ հիմա 2008 թվականի մարտի 1-2-ին տեղի ունեցած իրադարձությունների ժամանակ 10 զոհերի մահվան հանգամանքները բացահայտված չեն, իսկ զոհերի հարազատներին փոխհատուցում չի տրվել: Այս մասին, այսօր՝ փետրվարի 21-ին, ԱԺ պետաիրավական մշտական հանձնաժողովի՝ այսօր կայացած նիստում հայտարարեց «Ելք» խմբակցության ղեկավար Նիկոլ Փաշինյանը, ով առաջարկեց ԱԺ հայտարարության տեքստ ընդունել այդ կապակցությամբ:
Փաշինյանն ընթերցեց 10 զոհվածների անունները եւ նշեց, որ հանցագործությունը բացահայտելու խոստումները մինչ օրս ի կատար ածված չեն. «ՀՀ իրավապահ մարմիններն խոստումներ են տալիս, որ առաջիկայում կունենանք արդյունքներ սպանությունների բացահայտման առումով, բայց արդյունքները չենք տեսնում»,-ասաց Փաշինյանը՝ հավելելով, որ այս նիստին ներկա է նախկին գլխավոր դատախաղ Գեւորգ կոստանյանը, ով եւս նման խոստումներ տվել է: նա ընդգծեց, որ Հայաստանում եղել են քաղբանտարկյալներ եւ այսօր էլ կան քաղբանտարկյալներ՝ Անդրիաս Ղուկասյան, Կարող Եղնուկյան եւ այլն, իսկ 2008-ը առանձնանում է նրանով, որ քաղբանտարկյալների թիվն աննախադեպ մեծ է եղել:
«Այսօր իրավական ու ժողովրդավարական շապիկի տակ թաքնված է ընդդիմադիրներին հետապնդող եւ անընդհատ քաղբանտարկյալներ ունեցող մի համակարգ»,-ասաց ընդդիմադիր գործիչը՝ հայտարարելով, որ Հայաստանում բոլոր նախագահական ընտրությունները կեղծված են եղել:
«Գործող իշխանությունը Սերժ Սարգսյանն գլխավորությամբ իշխանության է եկել կեղծված եւ արյունով հաստատված ընտրությունների արդյունքում: Նենգափոխել ընտրությունների արդյունքերը՝ նշանակում է որոշակի իրավիճակ հարկադրել հանրությանը: Մեկ-երկու եւ հանրությունը, բնականաբար, պետք է պաշտպանվելու փորձ անի: Երբ իրավական ճանապարհով չեն կարողանում պաշտպանվել, պետք է այլ միջոց գտնեն: Երրորդ Հանրապետությունում տեղի ունեցած բոլոր քաղաքական բռնությունները կապված են հենց այս փաստի հետ: Լավ, ասենք, քաղաքացին հանրահավաք արեց, գնաց տուն, հետո էլ հանրահավաք արեց, գնաց տուն: Մարդը ցույց է անում, որ իր խնդիրները լուծվեն, ու եթե խնդիրը չի լուծվում, քաղաքացին կարող է եզրակացնել, որ եթե այսպես չեն լուծվում, այլ կերպ գնա ու լուծի հարցը»,-հայտարարեց Փաշինյանը:
Նա ընդգծեց, որ «Մարտի 1»-ի իրադարձությունների քննման հետեւանքով ստեղծված փաստահավաք խմբի տրամադրության տակ ժամանակին առկա են եղել փաստեր, որոնք կարող էին շղթայաբար բացահայտել ոչ միայն մարտի 1-ին տեղի ունեցածը, այլեւ ընտրությունների կեղծման համակարգի, բանակի ներգրավման փաստերը. «Ահա այս ամենի արդյունքում է, որ Սերժ Սարգսյանը լուծարեց Փաստահավաք խումբը, որից հետո արդեն խմբի երկու անդամները հրապարակեցին եւս 4 զեկույց, որը եկավ ապացուցելու նախորդ պնդումը»:
Հիշեցնենք, որ 2008 թվականի մարտի 1-ին իշխանությունը ուժ կիրառեց Երեւանի կենտրոնում ցույց անող ընդդիմության նկատմամբ, զոհվեց 8 ցուցարար եւ ներքին զորքերի 2 զինծառայող։ Մարդկանց զոհվելու համար ոչ ոք այդպես էլ պատասխանատվություն չկրեց։