Փետրվարի 22-ի նիստում կառավաության հավանությունը ստացավ երկրում էկոլոգիական կրթության եւ դաստիարակության զարգացման ռազմավարությունը: Որոշման նախագիծը ներկայացրեց բնապահպանության նախարար Արծվիկ Մինասյանը:
Նրա խոսքով՝ այս ռազմավարության նպատակն է երկրում էկոլոգիական մշակույթի բարձրացումը էկոլոգիական գիտելիքներ տրամադրելով ինչպես նախադպրոցական հաստատություններում, այնպես էլ դպրոցներում եւ բուհերում: Ըստ որում՝ առաջարկվում է հանրությանը ներգրավել ոչ պաշտոնական եւ լրացուցիչ էկոլոգիական կրթության գործընթացի մեջ:
«Ռազմավարության մեջ ներգրավվել են նաեւ կրթության եւ գիտության, տարածքային կառավարման եւ զարգացման նախարարությունները, այլ գերատեսչություններ, քանի որ հարցը մեծածվալ է եւ առնչվում է պետական կառավարման բոլոր ոլորտներին»,- նշեց նախարարը: Նա հավելեց, որ նախատեսվում է նաեւ միջգերատեսչական հանձնաժողովի ստեղծում:
Որոշման նախագծի հիմնավորման համաձայն՝ այս ռազմավարության ընդունման անհրաժեշտությունը եւ անհետաձգելիությունը պայմանավորված են երկրի անբարենպաստ էկոլոգիական իրավիճակով: Փաստաղթում նշված է, որ էական տարբերություն է նկատվում տնտեսական աճի եւ շրջակա միջավայրի որակի միջեւ, ինչի եւս մեկ պատճառը հասարակական էկոլոգիական իրազեկվածության եւ վարքի չափազանց ցածր մակարդակն է: Էկոլոգիական կրթության եւ դաստիարակության ռազմավարական նշանակությունը պետք է նշվի կրթական բարեփոխումների շրջանակում, ինչն անհրաժեշտ է շրջակա միջավայրի եւ տնտեսության անվտանգության ապահովման համար՝ որպես ազգային անվտանգության կարեւորագույն բաղադրիչ:
«Էկոլոգիական կրթությունը անհատական ուսուցման, դաստիարակության եւ զարգացման շարունակական, բազմանիստ ու պարտադիր գործընթաց է: Նրա նպատակն է շրջակա միջավայրի նկատմամբ հոգատար վերաբերմունքի տեսական ու պրակտիկ գիտելիքների եւ հմտությունների ձեռքբերումը, ինչպես նաեւ էկոլոգիական արժեհամակարգի, վարքի եւ մշակույթի ձեւավորումը»,- նշված է հիմնավորման մեջ:
