Amnesty International միջազգային իրավապաշտպան կազմակերպությունը հրապարակել է 2016-2017 թվականներին մարդու իրավունքների վերաբերյալ իր զեկույցը, որում ներկայացված է 2017 թվականի ընթացքում աշխարհի 159 երկրներում եւ տարածքներում մարդու իրավունքների հետ կապված իրավիճակը: Իրավապաշտպան կազմակերպության զեկույցի՝ Հայաստանին վերաբերող հատվածում նշվում է, որ 2016 թվականին Երեւանում տեղի ունեցած ցույցերի ընթացքում ոստիկանության կողմից անհամաչափ ուժի կիրառման համար գրեթե ոչ ոք պատասխանատվության չի ենթարկվել: Նշվում է, որ տասնյակ ցուցարարների դեմ քրեական գործեր են հարուցվել՝ հասարակական կարգի ենթադրյալ խախտման եւ այլ հանցագործությունների համար: Ոստիկանների կողմից լիազորությունների չարաշահման մասին պնդումների հիման վրա հարուցված քրեական գործով մեղադրանքներ չեն ներկայացվել:
Զեկույցում հիշեցվում է, որ 2016 թվականի բողոքի ակցիաներին մասնակցող ընդդիմադիր կուսակցությունների անդամները դատապարտվել են մի շարք բռնի հանցանքների, այդ թվում՝ ոստիկաններին պատանդ վերցնելու եւ այլ բռնի գործողությունների համար: Նրանցից մի քանիսը հայտնել են, որ կալանքի տակ գտնվելու ժամանակ ծեծի են ենթարկվել, իսկ փաստաբանները հայտնել են, որ իրենց վրա ճնշումներ են գործադրվել եւ նպատակաուղղված խոչընդոտել են իրենց աշխատանքը: Ըստ իրավապաշտպանների՝ վերսկսվել են իրավապաշտպան Մարինա Պողոսյանի գործով դատական լսումները, որը հայտնի է կոռուպցիոն մեխանիզմների բացահայտումներով եւ իրավաբանական օգնություն է տրամադրում նրանց, որոնց իրավունքները խախտվել են:
Amnesty International-ի զեկույցում նշվում է, որ ՀՀ-ում խորհրդարանական ընտրությունների եւ Երեւանի ավագանու ընտրությունների ընթացքում բռնության դեպքեր են գրանցվել: Իրավապաշտպան կազմակերպությունը նաեւ նշում է, որ ՄԱԿ-ի՝ Ռասայական խտրականության վերացման հարցերով հանձնաժողովն անհանգստություն է հայտնել փոքրամասնությունների, փախստականների եւ ապաստանի համար դիմողների վերաբերյալ տնտեսական, սոցիալական եւ մշակութային իրավունքների իրացման մասին տվյալների բացակայության կապակցությամբ: Ըստ կազմակերպության՝ բացակայում են ազգային փոքրամասնությունների մասին տվյալները, ինչպիսիք են, օրինակ, մոլոկանները և լոմերը՝ խնդրելով ՀՀ իշխանություններին տնտեսական եւ սոցիալական ցուցիչներով տվյալներ ներկայացնել՝ ազգությունների, քաղաքացիության եւ ծագման երկրի տարանջատմամբ:
