Երեւան քաղաքի ընդհանուր իրավասության դատարանի Շենգավիթ վարչական շրջանի նստավայրում այսօր՝ փետրվարի 22-ին, կաշառք վերցնելու մեջ մեղադրվող նախկին դատավոր Իշխան Բարսեղյանի գործով նիստը կրկին չկայացավ: «Դատապարտյալների հիվանդանոց» ՔԿՀ-ում գտնվող Իշխան Բարսեղյանը գրություն էր ուղարկել դատարան, որով տեղեկացրել էր, որ վատառողջ է եւ չի կարող ներկայանալ դատարան: Նա դիմումով տեղեկացրել էր, որ առողջական վատ վիճակում է եւ խնդրել էր հետաձգել դատական նիստը:
Այսօրվա դատական նիստին չէր ներկայացել նաեւ դատախազ Կարեն Բիշարյանը:
Դատարանը նիստը հետաձգեց մինչեւ մարտի 15-ը:
Իշխան Բարսեղյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 3-րդ կետով՝ կաշառք ստանալը: Կաշառքի միջնորդություն կատարելու համար փաստաբան Էլզա Զաքարյանին էլ մեղադրանք է առաջադրվել ՀՀ քրեական օրենսգրքի 313-րդ հոդվածի 1-ին մասով՝ Կաշառքի միջնորդությունը: Իշխան Բարսեղյանի նկատմամբ որպես խափանման միջոց ընտրվել է կալանավորումը:Նշենք, որ ըստ ԱԱԾ տարածած հաղորդագրության՝ քաղաքացիական գործով կողմի օգտին որոշում կայացնելու համար դատավորը պահանջել եւ Երեւանի հետիոտնային գետնանցումներից մեկում անձամբ ստացել է 1000 ԱՄՆ դոլար գումար, որի փոխանցումն իրականացվել է Ազգային անվտանգության ծառայության աշխատակիցների օպերատիվ վերահսկողության ներքո: