Բջջային օպերատորները կպարտավորվեն փոխանցել արտակարգ իրավիճակների ծառայություններ՝ ԱԻՆ 112 (911) եւ ոստիկանություն (102) զանգահարած բաժանորդների անձնական տվյալներն ու կոորդինատները։ «Էլեկտրոնային հաղորդակցության մասին» օրենքում լրացում կատարելու համապասխան նախագիծը հավանության է արժանացել փետրվարի 22-ի կառավարության նիստում։ Նախագիծը ներկայացրել է տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը։
Նրա խոսքով՝ արտակարգ իրավիճակների ծառայությունների պրակտիկայում հաճախ են լինում դեպքեր, երբ օգնության դիմած քաղաքացիները օբյեկտիվ եւ սուբյեկտիվ պատճառներով չեն կարողանում պարզ կամ մոտավոր տեղեկություններ տրամադրել իրենց գտնվելու վայրի մասին այն դեպքում, երբ անհապաղ օգնության կարիք ունեն:
«Այն դեպքերում, երբ օգնությունն ուշանում է, ստիպված ենք լինում ներգրավել նոր ուժեր: Իրավիճակը արմատապես փոխվում է, երբ արագ արձագանքման ծառայություններն ու օպերատորները հնարավորություն ունեն որոշելու զանգահարած քաղաքացու կոորդինատները»,–նշեց նա՝ հիմնվելով ԱՄՆ–ի ու ԵՄ–ի հաջողված փորձի վրա։
Նրա խոսքով՝ բաժանորդների գտնվելու վայրի որոշման համակարգի ներդրումը զգալիորեն կնվազեցնի օգնության տրամադրման ժամանակը, կօգնի հասցեական արձագանքնել եւ կկրճատի ներգրավվող լրացուցիչ ռեսուրսները։
