Վերաքննիչ քրեական դատարանը փետրվարի 21-ին հետաձգել է 2016թ. մարտին ծառայակցի կողմից սպանված զինծառայող Հովհաննես Հարությունյանի իրավահաջորդի ներկայացուցչի բողոքի քննությունը: Նիստը նախագահող դատավոր Ռուբիկ Մխիթարյանը տեղեկացրել է, որ ամբաստանյալ Միքայել Զաքարյանին Արցախի Հանրապետությունից Երեւան չեն տեղափոխել, նրա ներկայությունը դատարանում չի ապահովվել, քանի որ «Նուբարաշեն» ՔԿՀ-ում չի եղել:
Առաջին դատական նիստին չի ներկայացել նաեւ գործով դատախազը: Հաջորդ նիստը նշանակվել է մարտի 29-ին:
Սպանված զինծառայողի ծնողները պնդում են, որ Լեռնային Ղարաբաղի ընդհանուր իրավասության դատարանն ամբաստանյալ Միքայել Զաքարյանի նկատմամբ մեղմ դատավճիռ է կայացրել՝ ընդամենը 10 տարվա ազատազրկման դատապարտելով: Նրանք Վերաքննիչ քրեական դատարանից պահանջում են Քրեական օրենսգրքի 104-րդ հոդվածի 2-րդ մասի հատկանիշներով նախատեսվող ամենախիստ պատիժը:
Ըստ մեղադրական եզրակացության` Միքայել Զաքարյանը ինքնաձիգով հանկարծակի դիտավորությամբ մեկ անգամ կրակել է համածառայակից Հովհաննես Հարությունյանի վրա: Բացի դրանից, վիճաբանության մեջ է մտել շարքային Սամվել Զեյնալյանի հետ, եւ բռունցքով մեկ անգամ հարվածել նրան: Սամվել Զեյնալյանը նույնպես բռնություն է գործադրել նրա նկատմամբ:
Միքայել Զաքարյանին մեղադրանք է առաջադրվել Քրեական օրենսգրքի 104-րդ հոդվածի 2-րդ մասի 10-րդ կետով եւ 359-րդ հոդվածի 1-ին մասով, իսկ Սամվել Զեյնալյանին` 359-րդ հոդվածի 1-ին մասով:
Միքայել Զաքարյանն իրեն առաջադրված մեղադրանքում մեղավոր չի ճանաչում: Նրա փաստաբանը՝ Էրիկ Բեգլարյանը մեզ հետ զրույցում նշել էր, որ Հովհաննեսը Միքայելի ինքնաձիգը կատակով փորձել է վերցնել եւ հենց այդ ժամանակ էլ արձակվել է մահացու կրակոցը:
Հիշեցնենք, որ Հովհաննես Հարությունյանը զոհվել էր 2016թ. մարտի 17-ին՝ ժամը 17:30-ի սահմանում, ՊԲ հարավային ուղղությամբ տեղակայված զորամասերից մեկի պահպանության տեղամասում: