Կառավարությունը փետրվարի 22-ի նիստում հավանություն է տվել Բնական պաշարների կառավարման ռազմավարությանը: Որոշման նախագիծը ներկայացրել է Էներգետիկ ենթակառուցվածքների եւ բնական պաշարների նախարար Աշոտ Մանուկյանը:
Նրա խոսքով, այս ռազմավարության մեջ ուշագրավն այն է, որ Հայաստանում առաջին անգամ ընդերքօգտագործողները կպարտավորվեն վերամշակել իրենց գործունեության արդյունքում առաջացած թափոնները: «Խոսքը պոչամբարների մասին է, որոնք 22–ն են երկրում», - պարզաբանել է նախարարը:
Այս ռազմավարությունը նախատեսում է Հայաստանի բնական պաշարների կայուն կառավարման համար նախադրյալներ ստեղծում`բնական ռեսուրսների (մակերեւութային եւ ստորերկրյա ջրերի, հողի, հանքարդյունաբերության, կենդանական եւ բուսական աշխարհի) որակական եւ քանակական ցուցանիշների վերահսկում՝ բնական ռեսուրսների քանակական գնահատման եւ դրանց տնտեսական արժեքի որոշման համատեքստում։
Փաստաթղթում նշվում է, որ հանքային ռեսուրսների արդյունավետ կառավարման նպատակն է հանքարդյունաբերության կայուն զարգացման ապահովումը, որին կարելի կլինի հասնել շրջակա միջավայրի, սոցիալական եւ տնտեսական խնդիրների լուծման ուղղությամբ համակցված եւ համադրելի միջոցառումների շնորհիվ:
Հայաստանի բնական պաշարների արդյունավետ օգտագործման առաջնային պայմանը բնական ռեսուրսների կայուն կառավարումն է, որը հիմք է հանդիսանում հանքային ռեսուրսների, անտառների, հողային եւ ջրային ռեսուրսների օգտագործման եւ պահպանման եւ կենսաբազմազանության ապահովման պետական քաղաքականության իրականացման համար:
Ռազմավարությունը նախատեսում է ոչ միայն մետաղական, այլ նաեւ ոչ մետաղական հումքի համապարփակ վերամշակման, պատրաստի արտադրանքի ստացման, բարձրորակ եւ էկոլոգիապես մաքուր տեխնոլոգիաների ներմուծման, երկրի ընդերքի տնտեսապես արդյունավետ շահագործման եւ ներդրումների համար բարենպաստ պայմաններ ստեղծման մեխանիզմներ: