Արցախում այսօր ժամկետային զինծառայող է զոհվել: Գրիգոր Եղոյանը մահացու վիրավորում է ստացել Ադրբեջանի զինուժի արձակած կրակոցից: 20-ամյա զինծառայողը Ախուրյան գյուղից էր, 5 ամսից զորացրվելու էր: Գրիգորը տան կրտսեր զավակն էր, քույր եւ եղբայր ունի: Եղոյանների ընտանիքը Ռուսաստանում է բնակվում, երիտասարդը Հայաստան էր եկել՝ ծառայության մեկնելու: Գրիգոր Եղոյանը հետմահու պարգեւատրվել է «Մարտական ծառայություն» մեդալով:
Միաժամանակ, նշվել է զինհոսպիտալում զինծառայողի մահվան նախնական վարկածը: Նշանակված դատաբժշկական փորձաքննության եզրակացությունը դեռ չի ստացվել, սակայն դիահերձման արդյունքներով՝ դատաբժիշկները որպես մահվան հանգեցրած պատճառ նշել են ուղեղի այտուցը, իսկ մահվան հիմնական պատճառն անհայտ ծագման կոման է: Քննչական կոմիտեն պարզել է, որ երիտասարդն արձակուրդից հետո հորեղբոր հետ Գառնիից Երեւան է եկել՝ Իջեւանի զորամաս մեկնելու: Ճանապարհին Ստեփանի ինքնազգացողությունը վատացել է, բայց որոշել է զորամաս հասնել: Նույն օրն իսկ զինծառայողը զորամասի բուժկետ է դիմել, իսկ հետո անգիտակից վիճակում հոսպիտալ տեղափոխվել: Հաջորդ օրը նա մահացել է:
ՀՀԿ-ի եւ ՀՅԴ-ի խորհրդարանական խմբակցությունները վաղը համատեղ նիստ են հրավիրելու՝ նախագահի պաշտոնում Արմեն Սարգսյանի թեկնածությունն առաջադրելու համար: Նախագահի ընտրությունը սպասվում է մարտի 2-ին: Նշենք, որ առաջին իսկ փուլով ընտրվելու համար անհրաժեշտ է 79 պատգամավորի կողմ քվե:
Միաժամանակ, Նիկոլ Փաշինյանն այսօր Facebook-ում գրել է, որ «Ելք»-ը պատրաստվում է Սահմանադրական դատարան դիմել՝ պահանջելով հակասահմանադրական ճանաչել ԱԺ կանոնակարգի այն դրույթները, որոնցով նախատեսվում է Հանրապետության նախագահին ընտրել Ազգային ժողովում: ՍԴ դիմելու համար 21 պատգամավորի ստորագրություն է անհրաժեշտ: «Ելք»-ը դիմումի տեքստն արդեն ուղարկել է «Ծառուկյան» դաշինքին:
Սահմանադրական դատարանի նախագահն այսօր լրագրողների հետ զրույցում մեկնաբանել է 4-րդ նախագահի ընտրությունն ԱԺ-ի կողմից անցկացնելու սահմանադրականության հարցը: Ավելի վաղ փաստաբան Վահե Գրիգորյանը հայտարարել էր, թե նոր Սահմանադրության 125-րդ հոդվածը, որի համաձայն՝ 4-րդ նախագահը պետք է ընտրվի Ազգային ժողովի կողմից, ուժի մեջ է մտնելու 4-րդ նախագահի լիազորությունների ստանձնման հաջորդ օրը։ Արդյունքում, ըստ փաստաբանի, ստացվում է, որ նախագահը պետք է ընտրվի նախկին Սահմանադրությամբ ամրագրված կարգով՝ համաժողովրդական հանրաքվեով:
Կարեն Կարապետյանն առողջապահական հաստատությունների քաղաքաշինական նորմերի վերանայման անհրաժեշտություն է տեսնում: Կառավարության այսօրվա նիստում վարչապետը դժգոհել է. բուժհաստատություններ ենք կառուցում, որոնց ծախսերի տակից հետո չենք կարողանում դուրս գալ: 2017 թվականին բյուջեի եկամուտները, նախորդող տարվա համեմատ, աճել են, սակայն խնդիրներ դեռ կան: Կարեն Կարապետյանը լուծումներ է պահանջել՝ հարկային ստվերի ռիսկերը նվազեցնելու համար:
Կառավարության նիստում եւ դրան հաջորդած ճեպազրույցներում անդրադարձ է եղել մի շարք բնապահպանական հարցերի: Արծվիկ Մինասյանը նույնիսկ կատակել է. այսօրվա նիստը «կանաչ» էր: Ճեպազրույցում նախարարին հարցրել են Գառնու ձորում հայտնված բեռնատարի եւ սկսված շինարարության մասին: Մամուլում եւ սոցցանցերում հրապարակված լուսանկարներից երեւում է, որ այն ընթանում է «Քարերի սիմֆոնիայի» մոտ: Բնապահպանության նախարարությունը նույնպես ահազանգ է ստացել: Ավելի ուշ նախարարությունը հաղորդագրություն է տարածել՝ նշելով, որ Գառնու ձորում փայտե տաղավարը թեեւ սեփականաշնորհված տարածքում է, բայց գտնվում է հուշարձաններից ընդամենը 12 մետր հեռավորությամբ: Կառուցապատողին պարտավորեցնելու են դադարեցնել շինարարությունը՝ մինչեւ շրջակա միջավայրի վրա ազդեցության գնահատումը: Սեփականաշնորհված տարածքը, սակայն, գյուղատնտեսական նշանակության է, ինչը նշանակում է, որ որեւէ շինաշխատանք իրականացվել չի կարող:
Բնապահպանության նախարարությունն ուսումնասիրում է նաեւ Ախթալայի պոչամբարի նյութերը Դեբեդ գետը թափվելու մասին ահազանգը: Արդեն հանձնարարվել է փորձաքննության ենթարկել գետը թափվող հեղուկը: Եթե մտահոգությունները հաստատվեն, Արծվիկ Մինասյանը խոստանում է, որ մեղավորները պատասխանատվության կենթարկվեն:
«Աշտարակ Կաթ»-ի գործունեությունից տուժած տնտեսվարողներն այսօր նամակ են հանձնել վարչապետին: Նրանք պահանջում են վերահսկողության տակ վերցնել ընկերությունից տուժած տնտեսվարողների խնդիրը եւ հնարավորինս արագ լուծում գտնել: Պնդում են, որ պատահական են տեղեկացել, որ գումար են պարտք «Աշտարակ կաթ»-ին, եւ իրենց հաշվեհամարներն ու գույքը կալանքի տակ են: «Հայ տնտեսվարողների եւ սպառողների իրավապաշտպան կենտրոն»-ի նախագահն էլ նշում է, որ «Աշտարակ կաթ»-ը փորձում է գումար շորթել 240 մանրածախ տնտեսվարողներից: Արթուր Աթոյանի խոսքով՝ «Աշտարակ կաթ»-ում հանցավոր խումբ է գործել. մանրածախ տնտեսվարողները մինչեւ 2016 թվականն ապրանք են ստացել առաքիչներից ու վճարել: Առաքիչներն էլ իրենց անդորրագիր են տվել, նոր ապրանք բերել ու կանխիկ գումար գանձել:
Մարտի 1-ից մի շարք դեղամիջոցներ Հայաստանում հնարավոր կլինի գնել միայն դեղատոմսով: Առողջապահության նախարարությունն այսօր հրապարակել է այդ դեղերի ցանկը: Դրանց թվում են հանրապետությունում գրանցված հակավարակային դեղամիջոցները, այդ թվում՝ հակաբիոտիկները, ինչպես նաեւ հսկվող եւ հորմոն պարունակող դեղերը: Միաժամանակ, սահմանվել է դեղատոմսի 4 նոր ձեւաթուղթ՝ թմրամիջոցների, հոգեմետ նյութերի, մեկանգամյա կամ բազմակի անգամ տրամադրվող դեղերի համար: Ինչ վերաբերում է ժամկետներին. թմրանյութեր ու հոգեմետ նյութեր պարունակող դեղերի դեղատոմսերն ուժի մեջ կլինեն 10 օր, իսկ մնացած դեղերն ու բազմակի դեղատոմսերը՝ 6 ամիս:
Այս օրերին հարցի շուրջ բուռն քննարկումներ են եղել: Ոմանք կարծում են, որ որոշումը կբարդացնի հատկապես սոցիալապես անապահով խավի կյանքը: Ամեն անգամ դեղ գնելու համար հարկ կլինի բժշկի դիմել, հերթ կանգնել՝ դեղատոմս ստանալու համար, իսկ խորհրդատվության համար մարդիկ ստիպված կլինեն վճարել: Ոլորտի պատասխանատուները, սակայն, հակադարձում են. իրենց նպատակը բնակչության առողջության պահպանումն է:
Հայ մարզիկներն ավարտեցին մրցելույթները Հարավային Կորեայում անցկացվող ձմեռային Օլիմպիական խաղերում: Փհենչհան-2018-ում Հայաստանի թիմը ներկայացված էր 3 մարզիկով՝ դահուկորդներ Միքայել Միքայելյանը, Կատյա Գալստյանը եւ լեռնադահուկորդ Աշոտ Կարապետյանը: Միքայել Միքայելյանը դահուկավազքի սպրինտում գրավեց 72-րդ տեղը, իսկ 15 կմ դասական ոճում 83-րդն էր: Կանանց մրցաշարում Կատյա Գալստյանը դահուկավազքի 10 կմ դասական ոճում զբաղեցրեց 72-րդ հորիզոնականը: Հայաստանի մարզիկներից լավագույն արդյունքը ցուցադրեց 18-ամյա Աշոտ Կարապետյանը. այսօր նա հատուկ ոլորավայրէջքում 2:08.08 արդյունքով հայտնվեց 42-րդ տեղում: Հավելենք, որ 23-րդ ձմեռային Օլիմպիադան կավարտվի փետրվարի 25-ին:
Դոլարի անկումը կանգ առավ, եվրոն շարունակում է արժեզրկվել: Փետրվարի 22-ին դոլարի փոխարժեքը կազմել է 480 դրամ, եվրոյինը՝ 590, ռուբլունը՝ 8 դրամ 47 լումա, ֆունտինը՝ 667 դրամ:
Փետրվարի 23-ին հանրապետությունում սպասվում է առանց տեղումների եղանակ: Օդի ջերմաստիճանը ցերեկը 3-4 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի 0+2, ցերեկը՝ +14+16 աստիճան տաքություն: