Այս պահին Ազգային ժողովում ընթանում է ՀՀԿ-ի կողմից ՀՀ նախագահի թեկնածու առաջադրված Արմեն Սարգսյանի եւ Հանրապետական ու Դաշնակցություն խմբակցությունների ներկայացուցիչների հանդիպումը:
Արմեն Սարգսյանին հաջողվել է լրագրողներից աննկատ գալ այդ հանդիպմանը: Հանդիպումն ընթանում է փակ դռների հետեւում:
Սպասվում է, որ հանդիպումից հետո կհայտարարվի Արմեն Սարգսյանի՝ ՀՀ նախագահի պաշտոնում առաջադրելու մասին պաշտոնական առաջադրման մասին, քանի որ նախօրեին ՀՀԿ-ն ստորագրահավաք էր սկսել նրա առաջադրման համար: Հիշեցնենք, որ ՀՀ նախագահի թեկնածու առաջադրելու համար անհրաժեշտ է ԱԺ պատգամավորների թվի 1/4-ի ստորագրությունը (27 ստորագրություն):
Ավելի վաղ NEWS.am-ը հայտնել էր, որ այսօր՝ փետրվարի 23-ին, ՀՀԿ խմբակցության ներկայացուցիչները խորհրդարանում հանդիպելու են նախագահի թեկնածու Արմեն Սարգսյանի հետ: Վերջինս մի անգամ արդեն հանդիպել է ՀՀԿ-ականների հետ, բայց կուսակցության գրասենյակում եւ ՀՀԿ խորհրդի հետ, այս անգամ նա հանդիպում է կոնկրետ այն մարդկանց հետ, ովքեր մեկ շաբաթ հետո պետք է իրեն նախագահ ընտրեն:
Հիշեցնենք, որ Արմեն Սարգսյանը համաձայնել է ՀՀԿ-ի կողմից թեկնածու առաջադրվելու Սերժ Սարգսյանի առաջարկին: նախնական տեղեկություններով, ՀՀ նախագահի ընտրությունը ԱԺ-ում տեղի կունենա մարտի 2-ին:
