Ներկայումս համայնքներում ԵՄ-ի հետ 8 խոշոր ծրագիր է իրականացվում, որոնք մոտ 1000 աշխատատեղ ստեղծող ծրագրեր են: Այս մասին, այսօր՝ փետրվարի 23-ին, լրագրողների հետ հանդիպման ժամանակ նշեց ՀՀ տարածքային կառավարման եւ զարգացման նախարար Դավիթ Լոքյանը՝ ներկայացնելով 2017թ. կատարած աշխատանքներն ու 2018-ի անելիքները:
Նրա խոսքով, օրինակ, Տավուշի մարզում թվով 45 ծրագրեր են իրականացվում «Ինտեգրված աջակցություն սահմանամերձ բնակավայրերի բնակիչներին» ծրագրով. «2017-ին շուրջ 55 ջերմոցային տնտեսություններ են ստեղծվել, 9 գինու արտադրություն, 7 սառնարանային տնտեսություններ, չորանոցներ, 27 հա ինտենսիվ այգիներ, գյուղտեխնիկա, ոռոգվող նոր տարածքներ: Սա օրինակ է, որ մասնավորը համագործակցում է պետության կամ միջազգային կառույցների հետ տնտեսական ծրագիր իրականացնելու հարցում: Այսօր Տավուշի մարզում ունենք 9 ընտանիք, որ ստանալով օժանդակություն, արտադրում են լավագույն գինիների օրինակներ, որոնց մի մասն արդեն արտահանվել է Ռուսաստան»,-ընդգծեց նախարարը՝ հավելելով, որ Ամասիայի շրջանում էլ բրդի թելի արտադրության ծրագիր են սկսել, որից հետո նմանատիպ շատ առաջարկներ ենք ստացել այլ համայնքներում: