Ադրբեջանը փորձում է ժամանակին իրականացրած հայկական ջարդերի զոհերին մեղադրել այդ հանցագործությունների կազմակերպման մեջ: Այս մասին փետրվարի 23-ին մամուլի ասուլիսում հայտարարեց ԱԳ նախարար Էդվարդ Նալբանդյանը:
Պատասխանելով Ադրբեջանի ԱԳՆ-ի եւ Գլխավոր դատախազության մեկնաբանության մասին հարցին՝ կապված ողբերգական իրադարձությունների տարելիցի հետ, նախարարը նշեց, որ սա ինքնին տարօրինակ դուետ է: «Հիշեցնում է Վիշինսկու ժամանակները: Նույն ոճն է»,- նշեց Նալբանդյանը:
«Ադրբեջանական կողմը փորձում է պատասխանատվությունից խուսափել եւ զոհին է մեղադրում հանցագործության իրականացման մեջ: Պատմությունից հայտնի է, թե ինչ հետեւանքներ կարող են ունենալ այսպիսի փորձերը: Այսպիսի հանցագործությունների ժխտումը եւ զոհերին մեղադրելը բարենպաստ հող է ստեղծում նոր հանցագործությունների համար: Սումգայիթին հաջորդեց Կիրովաբադի սպանդը, Գանձակի, Բաքվի եւ այլն: Նորագույն պատմության օրինակն է 2016 թվականի ապրիլի լայնամասշտաբ ագրեսիան, որի ժամանակ ադրբեջանցի զինծառայողները սարսափազդու հանցագործություններ էին կատարել ԻԼԻՊ-ի ոճով»,- նշեց նախարարը
Պատասխանատվությունից խուսափելու փորձերը արդյունք չեն տա, եւ նրանք վաղ թե ուշ ստիպված կլինեն պատասխանել, եզրափակեց Նալբանդյանը:
