Մադագասկարը տպավորված է Հայաստանի տնտեսական աճի տեմպերով եւ մտադիր է նրանից օրինակ վերցնել։ Այս մասին փետրվարի 23-ին՝ Երեւանում կայացած արտգործնախարար Էդվարդ Նալբանդյանի հետ համատեղ մամուլի ասուլիսի ժամանակ հայտարարել է Մադագասկարի արտաքին գործերի նախարար Անրի Ռաբարի-Նձակային։
Մասնավորապես, նախարարը հիշեցրել է, որ անկախանալուց եւ 90-ականների ճգնաժամից մի քանի տարի անց իրավիճակը Հայաստանում կարգավորվել է. «Եթե համեմատենք մեր երկրի հետ, ապա միայն կարելի է հիանալ»,–նշել է նախարարը։
Նրա խոսքերով, Մադագասկարը պատրաստ է օրինակ վերցնել Հայաստանից: «Մենք հետաքրքրված ենք Հայաստանի փորձով: Դուք համագործակցում եք 180 միլիոնանոց շուկայի հետ (ԵՏՄ–խմբ.)», հավելել է նախարարը:
Նա հատկապես ընդգծել է զբոսաշրջության հնարավորությունները: «Մադագասկարում առկա է 5 հազար կմ ափամերձ տարածք: Մեր երկրում, աշխարհի կենսաբազմազանության 5 տոկոսն է գտնվում՝ էնդեմիկ տեսակների մեծ քանակությամբ: Իսկ մենք կարիք ունենք այնպիսի բարեկամական երկրի, ինչպիսին Հայաստանն է, որն ունի զբոսաշրջության փորձ: Եկեք եւ ձեզ համար բացահայտեք Մադագասկարը: Մենք կարող ենք նաեւ համատեղ ծրագրեր իրականացնել», -նշել է նախարարը:
Իր հերթին Էդվարդ Նալբանդյանը նշել է, որ ապրանքաշրջանառության ցուցանիշները մեծ չեն: «Եվ այդ իսկ պատճառով մենք որոշեցինք խթանել հարաբերությունները: Երկու երկրների հարաբերությունները հաստատվել են դեռ խորհրդային տարիներից: Պատվիրակություններ, ուսանողներ էին ժամանում, կային տնտեսական կապեր», - ավելացրել է նա: