Նորից մտել այս ամենի մեջ՝ անիմաստ զբաղմունք է: Այս մասին, այսօր՝ փետրվարի 23-ին, ԱԺ-ում կոալիցիոն գործընկերներ ՀՀԿ-ի եւ ՀՅԴ-ի հետ Արմեն Սարգսյանի հանդիպումից հետո լրագրողների հետ զրույցում նշեց ԱԺ ՀՅԴ խմբակցության քարտուղար Աղվան Վարդանյանը՝ անդրադառնալով տեսակետին, որ ըստ Սահմանադրության ԱԺ-ի կողմից ՀՀ նախագահ ընտրելը հակասահմանադրական է, քանի որ ԱԺ-ի կողմից նախագահ ընտրելու դրույթը դեռ ուժի մեջ չի մտել:
«Ես նեղ մասնագիտական իրավաբան չեմ. մի իրավաբան նման տեսակետ է հայտնել, տասնյակ ոչ պակաս հեղինակավոր իրավունքի մասնագետներ այլ տեսակետ են ասել, ընդ որում, շատ համոզիչ: Նորից մտել այս ամենի մեջ՝ անիմաստ զբաղմունք է»,-ասաց Աղվան Վարդանյանը»
Դիտարկմանը, թե տեսակետ կա, որ Արմեն Սարգսյանը ոչ թե ՀՀԿ-ի եւ ՀՅԴ-ի թեկնածուն է, այլ մի անձի՝ նախագահ Սերժ Սարգսյանի թեկնածուն է, Աղվան Վարդանյանն արձագանքեց .«Կա ՀՀԿ՝ իր առաջնորդով, կա Դաշնակցությունը: Արմեն Սարգսյանն արդեն այսօր իսկ ֆորմալացված 2 խմբակցությունների համատեղ թեկնածուն է: Այն պատկերացումները, որոնք ունի Արմեն Սարգսյանը, ամբողջովին համահունչ են Աղվան Վարդանյանի պատկերացումներին՝ կապված մեր երկրի ապագայի հատ»:
Նա նաեւ համակարծիք չէր տեսակետին, թե ում էլ առաջարկեր նախագահ Սերժ Սարգսյանը, միեւնույն է՝ ընդունելի էր լինելու ՀՅԴ-ի կողմից. «Կար թեկնածու առաջադրելու խնդիր, այլ կերպ սա ինչպե՞ս էիք պատկերացնում։ Հանրապետության նախագահը քննարկել է իր կուսակցության ներսում, ընտրել մի թեկնածու եւ առաջարկել»,-եզրափակեց Աղվան Վարդանյանը:
Ավելի վաղ NEWS.am-ը հայտնել էր, որ փաստաբան Վահե Գրիգորյանը հայտարարել էր, որ նոր Սահմանադրության 125–րդ հոդվածի համաձայն 4–րդ նախագահը չի կարող ընտրվել Ազգային ժողովի կողմից, քանի որ այդ կարգը սահմանող 125 հոդվածը ուժի մեջ է մտնելու ՀՀ 4–րդ նախագահի լիազորությունների ստանձնման հաջորդ օրը։ Ըստ փաստաբանի՝ ստացվում է, որ նախագահը պետք է ընտրվի նախկին Սահմանադրությամբ ամրագրված կարգով՝ ժողովրդի քվեով։
Իսկ արդեն փետրվարի 22-ին, «Ելք» խմբակցության ղեկավար Նիկոլ Փաշինյանը ֆեյսբուքյան իր էջում գրել էր, որ «Ելք»-ը կդիմի ՍԴ՝ ԱԺ-ի կողմից 4-րդ նախագահի ընտրությունը հակասահմանադրական ճանաչելու և համաժողովրդական քվեարկություն կազմակերպելու պահանջով։