Հայաստանի իշխանությունները կարծում են, որ երկրում ուժ եւ զենքի կիրառելու արտոնյալ իրավունք ունեն: Այս մասին, այսօր՝ փետրվարի 23-ին, ԱԺ-ում, 2008 թվականի մարտի 1-2-ի դեպքերի վերաբերյալ խորհրդարանական լսումների ժամանակ հայտարարեց ակտիվիստ, այդ իրադարձությունների մասնակից Վարդգես Գասպարին:

Նրա խոսքով, Հայաստանում ձեւավորվել ու արմատավորվել են բարքեր, ըստ որոնց ցանկացած քաղաքական հարց լուծվում է ուժի ու զենքի կիրառմամբ:

Դիմելով իշխանության ներկայացուցիչներին, գասպարին հայտարարեց, որ մարտի 1-ի 10 զոհերի համար մեղավոր են միայն նրանք. «Անմիջականորեն դուք եք գնդակահարել իմ հարազատներին, ոչ ավել, ոչ պակաս: Դա դուք եք արել՝ գտնվելով այս շենքում (նկատի ունի այն, որ արտակարգ դրություն երկրում մտցվել է խորհրդարանի համաձայնությամբ-խմբ): Ես ամեն կերպ ինձ զսպում եմ, որ չթքեմ ձեր դեմքին»,-ընդգծեց Գասպարին ու հեռացավ դահլիճից:

Նման հայտարարությունից մի փոքր շփոթված «Ելք» խմբակցության ղեկավար Նիկոլ Փաշինյանը, որը վարում է լսումները, մի քանի վայրկյան լռությունից հետո շնորհակալություն հայտնեց ակտիվիստին ելույթի համար եւ ձայնի իրավունքը փոխանցեց հաջորդ մասնակցին:

Հիշեցնենք, որ 2008 թվականի մարտի 1-ին իշխանությունը ուժ կիրառեց Երեւանի կենտրոնում ցույց անող ընդդիմության նկատմամբ, զոհվեց 8 ցուցարար եւ ներքին զորքերի 2 զինծառայող։ Մարդկանց զոհվելու համար ոչ ոք այդպես էլ պատասխանատվություն չկրեց։