Ազատ տնտեսական գոտիները ստեղծվում են ներդրումների ներգրավման, նոր աշխատատեղերի ստեղծման, արտահանման խթանման եւ ներկրման փոխարինման միջոցով Հայաստանի սոցիալ–տնտեսական զարգացմանը խթանելու համար։ Այս մասին ԱԺ Տնտեսական հարցերով մշտական հանձնաժողովի նիստին՝ «Ազատ տնտեսական գոտիների մասին» օրենքում փոփոխություններ կատարելու օրինագծի քննարկման ժամանակ հայտարարել է Տնտեսական զարգացման եւ ներդրումների փոխնախարար Հովհաննես Ազիզյանը։
Այս օրինագիծը, նրա խոսքով, կկարգավորի ազատ տնտեսական գոտիների շահառուներին թույլտվություն տրամադրման, լիազոր կազմակերպությունների կողմից պայմանագրային պարտավորությունների կատարման հետ կապված հարցերը, կկանոնակարգի ազատ տնտեսական գոտիների շահառուների եւ ոչ առեւտրային իրավաբանական անձանց, ինչպես նաեւ անհատ ձեռներեցների միջեւ հարաբերությունները։
«Օրենքի փոփոխությունը պայմանավորված է առկա խնդիրների լուծման անհրաժեշտությամբ, մասնավորապես, ազատ տնտեսական գոտիներում թույլտվությունների տրամադրումը եւ կազմակերպչի եւ շահագործողի պայմանագրային պարտավորությունների կարգավորումը»,–պարզաբանել է նա։
Օրինագիծն արժանացել է մշտական հանձնաժողովի հավանությանը։