Գյումրի քաղաքում գիշերային փլուզումը տեղի է ունեցել վթարային բնակելի շենքում, որը օգտագործվում էր որպես հանրակացարան։ Այս մասին, այսօր՝ փետրվարի 23-ին, լրագրողների հետ հանդիպման ժամանակ նշել է Քաղաքաշինության պետական կոմիտեի նախագահ Նարեկ Սարգսյանը:
Նրա տվյալներով, փլուզումը տեղի է ունեցել շենքի ոչ բնակելի հատվածում։ «Այնուամենայնիվ, այդպիսի շենքերում բնակվելն անվտանգ չէ»,–նշել է պաշտոնյան։
Նրա խոսքով, շենքը մասնավոր է, եւ Գյումրու քաքաքապետարանը պետք է սեփականատիրոջը պարատավորեցնի հետեւանքների վերացման ուղղությամբ քայլեր ձեռնարկել։
Նշենք, որ փետրվարի 23-ին, ժամը 03:30-ին ահազանգ էր ստացվել, որ Շիրակի մարզի Գյումրի քաղաքի Գ.Նժդեհի փողոցի թիվ 7 շենքի 4-րդ հարկում տեղի է ունեցել փլուզում։
Արտակարգ իրավիճակների նախարարության կայքի տվյալներով, դեպքի վայր էր մեկնել մեկ մարտական հաշվարկ:
Պարզվել էր, որ փլուզվել է թիվ 7 կիսաքանդ շենքի 4-րդ եւ 3-րդ հարկերի ծածկի պանելային հատվածը (մոտ 30 քմ):
Փրկարարները տարհանել էին 11 բնակչի (2 երեխա), անվտանգության ժապավենով սահմանազատել վտանգավոր հատվածը: