Այսօր առավոտյան կյանքի 88-րդ տարում մահացել է անվանի դիրիժոր Օհան Դուրյանը:
Դուրյանը ծնվել էր 1922թ. սեպտեմբերի 8-ին, Երուսաղեմում: Ուսանել է Երուսաղեմի կոնսերվատորիայում` Պֆեֆֆերի եւ Գրինտալի դասարաններում: 1945թ. ավարտել է կոնսերվատորիան եւ շրջագայելու մեկնել Եվրոպայով: 1960-65թ. եղել է Հայկական ֆիլհարմոնիայի գլխավոր դիրիժորը, իսկ 1971-ից` Օպերայի եւ բալետի հայկական թատրոնի դիրիժորը: Աշխատել է Բեռլինի, Դրեզդենի, Լեյպցիգի սիմֆոնիկ նվագախմբերի հետ:
Դուրյանն աշխատել է աշխարհի 110 նվագախմբերի հետ։
Հայաստանի անկախացումից հետո վերադարձել է հայրենիք, եւ ՀՀ իշխանությունների հրավերով ստանձնել Հայաստանի ազգային Օպերայի նվագախմբի գլխավոր դիրիժորի պարտականությունները: Տարիներ տեւած աշխատանքից հետո ներքին խարդավանքների պատճառով մաեստրոն հեռացել է նվագախմբից:
Հայաստանից հեռանալուց հետո Դուրյանն աշխատել է Մոսկվայում, սակայն կյանքի վերջում վերադարձել էր հայրենիք։ Նշենք, որ ի նշան բողոքի՝ մաեստրոն հետ է հանձնել ՀՀ իշխանություններից ստացած իր բոլոր բարձր պարգեւները՝ փոխարենը մշտապես մասնակցելով ընդդիմության կազմակերպած միջոցառումներին:
NEWS.am-ը ցավակցում է մաեստրոյի ընտանիքին, մտերիմներին, արվեստասեր ողջ հասարակությանը ցավալի կորստի կապակցությամբ:
