ԵՄ-ից Մեծ Բրիտանիայի դուրս գալը նշանակում է ընդհանուր բյուջեի կրճատում, եւ կորուստները կարելի է լրացնել հարստության համար նոր հարկ մտցնելով, այլ ոչ թե քաղաքացիների լրացուցիչ հարկման միջոցով, Բրյուսելում ԵՄ ոչ պաշտոնական գագաթաժողովից հետո լրագրողներին ասել է Հունաստանի վարչապետ Ալեքսիս Ցիպրասը, հաղորդում է «ՌԻԱ Նովոստին»:
Ըստ նրա՝ մի կողմից Brexit-ը նշանակում է բյուջետային միջոցների կրճատում, մյուս կողմից՝ ԵՄ-ն կանգնած է մի շարք նոր խնդիրների ու մարտահրավերների առաջ՝ սոցիալական իրավունքների իրականացում, երիտասարդների երաշխիքների ընդլայնված ծրագիր, փախստականների ճգնաժամի եւ միգրացիոն ճգնաժամի արձագանք, հետազոտությունների, զարգացման խորացման անհրաժեշտություն, միասնական թվային շուկա, անվտանգություն, արտաքին սահմանների պաշտպանություն:
«Կամ մենք պետք է էականորեն կրճատենք բյուջեն կամ համաձայնենք ԵՄ սոցիալական կարգավիճակի կրճատման հետ, որի դեմ մենք արտահայտվում ենք... Հաշվի առնելով, որ Մեծ Բրիտանիան լքում է ԵՄ-ն եւ հարկատուներին ավելի շատ չծանրաբեռնելու համար, լուծումը նոր ռեսուրսներ գտնելն է: Մենք պետք է ռեսուրսներ գտենք հարստության հարկման միջոցով, այլ ոչ հարկատուների: Դրանից ելնելով՝ ես ներկայացրել եմ մի քանի առաջարկներ՝ կապված ֆինանսական գործողությունների հարկի, այսպես կոչված Տոբինի հարկի, խոշոր համացանցային ընկերությունների հարկման, ընդհանուր հարկային բազայի մասին», — ասել է Ցիպրասը:
Նա հույս է հայտնել, որ քննարկումը կավարտվի մինչեւ եվրոպական ընտրությունները եւ հայտարարել է, որ ԵՄ-ն պետք է քայլեր անի ինչպես ժողովրդավարացման, այնպես էլ Եվրոպայի սոցիալական բնույթի ամրապնդման համար, որպեսզի այն ավելի գրավիչ դառնա իր քաղաքացիների համար:
