«Ծառուկյան» խմբակցության պատգամավոր Վահե Էնֆիաջյանը կարծում է, որ «Ելք» դաշինքի` Սահմանադրությունը ՍԴ-ում վիճարկելու նախաձեռնությունը իրավական հիմքեր ունի: Այս մասին NEWS.am-ի հետ զրույցում ասել է պատգամավորը: Հիշեցնենք, որ փաստաբան Վահե Գրիգորյանի այն բացահայտումից հետո, որ ՀՀ 4-րդ նախագահին Աժ-ի միջոցով ընտրելու դրույթը հակասահմանադրական է, քանի որ ուժի մեջ է մտնելու նախագահի լիազորությունները ստանձնելուց հետո, «Ելք»-ը որոշեց այդ դրույթները վիճարկել Սահմանադրական դատարանում: ՍԴ դիմելու համար անհրաժեշտ է 21 ստորագրություն, այդ իսկ պատճառով դիմել են «Ծառուկյան» խմբակցությանը: Խմբակցությունը դեռեսւ պաշտոնապես չի պատասխանել`միանալու է, թե ոչ, սակայն առանձին պատգամավորներ նպատակահարմար չեն համարում միանալ «Ելք»-ի նախաձեռնությանը:
«Իրավական հարթությունում իրականում խնդիրներ կան եւ, ըստ էության, եթե շահարկման հիմնահարց նայենք, հիմա Սահմանդրական փոփոխությունների տրամաբանությունն այն է, որ նախագահական գերլիազորությունները բեռնաթափել եւ խորհրդարանական լիազորությունները ավելացնելն է եւ ամբողջ գաղափարախոսությունը այս շեշտադրումների հետ է կապված եղել, հիմա տեխնիկական խնդիրները իրավական հարթությունում քաղաքական բուն գործընթացի առջեւ նսեմացնելը մտորումների տեղիք է տալիս: Եթե որոշակի հիմքեր չլինեին, մեր գործընկերները նախաձեռնությամբ հանդես չէին գա, բայց ես գտնում եմ, որ պետք է բովանդակային ձեւով հասկանալ` ինչ խնդիր է լուծվելու»,-ասել է Վահե Էնֆիաջյանը:
Նշենք, որ նախագահի ընտրությունը մարտի 2-ին է: