Արմավիր քաղաքի «Մանուշակ» մանկապարտեզում 3-ամյա երեխային պատանդ վերցնելու մեջ մեղադրվող Արգամ Հովիկյանի կալանքը եւս 2 ամսով երկարացվել է: Այս մասին NEWS.am-ի հետ զրույցում ասաց Արգամ Հովիկյանի պաշտպան Արսեն Սարգսյանը:
Նա նշեց, որ, ամենայն հավանականությամբ, նախաքննությունը դեռ 2 ամիս կշարունակվի:
Ավելի վաղ հայտնել էինք, որ կատարված փորձաքննությունների արդյունքում պարզվել է, որ Արգամ Հովիկյանը դեպքի պահին եղել է սթափ վիճակում:
Նշենք, որ Արգամ Հովիկյանն արդեն ցուցմունք է տվել, եւ հայտնել, որ մանկապարտեզ էր գնացել կնոջ հետ վերջնական խոսելու եւ նրան տուն վերադարձնելու նպատակով, իսկ եթե չստացվի նպատակ է ունեցել կնոջ աչքի առջեւ ինքնասպան լինել:
Ավելի վաղ ոստիկանությունը հայտնել էր, որ 2017թ. հոկտեմբերի 30-ին, ժամը 16:25-ին ահազանգ է ստացվել, որ մի տղամարդ դանակով զինված ներխուժել է Արմավիր քաղաքի «Մանուշակ» մանկապարտեզ: Պարզվել է, որ այդ քաղաքացին Արգամ Հովիկյանն է, որը դանակի սպառնալիքով մանկապարտեզում պատանդ է պահել 3-ամյա երեխայի՝ պահանջելով հանդիպում իր նախկին կնոջ հետ:
Նրա հետ բանակցություններ են վարել իրավապահ մարմինների ներկայացուցիչները: Բանակցությունների ընթացքում ոստիկանության ծառայողներին հաջողվել է երեխային անվնաս հանել սենյակից:
Ձեռք բերված բավարար ապացույցների հիման վրա՝ քննիչը որոշում է կայացրել տղամարդուն մեղադրանք առաջադրել Քրեական օրենսգրքի 34-104-րդ հոդվածի 2-րդ մասի 1-ին կետով եւ 218-րդ հոդվածի 2-րդ մասի 3-րդ եւ 4-րդ կետերով: Նա կալանավորված է:
