Հնդկական դպրոցներում կբացվեն հայկական «Արմաթ» ինժեներական լաբորատորիաներ։ Այս մասին փետրվարի 24-ին՝ լրագրողների հետ հանդիպման ժամանակ հայտարարել է Ինֆորմացիոն տեխնոլոգիաների ձեռնարկությունների միության (UITE) նախագահ Ալեքսանդր Եսայանը։
Նա նշել է, որ Ինֆորմացիոն տեխնոլոգիաների Համաշխարհային կոնգրեսի (World Congress in Information Technology- WCIT) ժամանակ հայակական պատվիրակությանը հաջողվել է հնդկական կողմի հետ պայամանավորվածություն ձեռք բերել հնդկական դպրոցներում հայկական ինժեներական լաբորատորիաներ ներդնելու շուրջ։
Մասնավորապես, UITE–ն՝ ի դեմս գործադիր տնօրեն Կարեն Վարդանյանի եւ հնդկական Lexicon PR Management Service ընկերությունն՝ ի դեմս գործադիր տնօրեն Ռամ Լուտրի ստորագրել են համագործակցության հուշագիր, որի համաձայն 2018 թվականին կմեկնարկի Հնդկաստանի դպրոցներում «Արմաթ» լաբորատորիաների ներդրման պիլոտային ծրագիրը։ Ծրագիրը կմեկնարկի Հնդկաստանի Հայդարաբադ քաղաքում, որտեղ էլ անցկացվել էր Կոնգրեսը։
«IT ոլորտը Հնդկաստանում շատ զարգացած է։ Այն հանգամանքը, որ հնդկական մեր գործընկերները հետաքրքրված են «Արմաթ» լաբորատորիաներով, ոգեւորում է»,–նշել է Եսայանը։
Նրա խոսքով, ծրագիրը կիրականացվի երեք փուլով՝ առաջին փուլը փաստացի պիլոտայինն է, որի հիման վրա հնդկական կողմը պետք է գնահատի այդ լաբորատորիաների արդյունքները, երկրորդ փուլում Հնդկաստանում հայկական լաբորատորիաների թիվը կ հասնի 300–ի, իսկ երրորդ փուլում՝ 3000–ի:
Հիշեցնենք, որ WCIT-ն փետրվարի 19-21-ը անցկացվել է Հնդկաստանի Հայդարաբադ քաղաքում, որից հետո Հնդկաստանը WCIT-ի 2019 թ.-ի կոնգրեսն անցկացնելու էստաֆետը հանձնել է Հայաստանին: