Հայաստանում Ինֆորմացիոն տեխնոլոգիաների համաշխարհային կոնգրեսի (World Congress in Information Technology- WCIT) անցկացումը ներդրումների ներգրավման հնարավորություն կդառնա։ Այս մասին փետրվարի 24-ին՝ լրագրողների հետ հանդիպման ժամանակ հայտարարել է Ինֆորմացիոն տեխնոլոգիաների ձեռնարկությունների միության (UITE) նախագահ Ալեքսանդր Եսայանը։
Նրա խոսքով՝ WCIT- 2018–ին, որն անցկացվել է Հնդկաստանի Հայդարաբադ քաղաքում, մասնակցել են աշխարհի մի շարք խոշորագույն ընկերությունների ղեկավարներ։
«Կոնգրեսի անցկացումը Հայաստանում երկրին հնարավորություն կտա ցույց տալ իր պոտենցիալը IT ոլորտում եւ ներդրումներ ներգրավել»,–նշել է Եսայանը՝ հավելելով, որ Հնդկաստանն այդ է հենց արել։
Հայկական պատվիրակությունը, տեսնելով Հնդկաստանում Կոնգրեսի շրջանակներում արված աշխատանքը, հասկացել է, թե ինչ ծավալով աշխատանք պետք է իրականացվի միջոցառումը Հայաստանում պատշաճ մակարդակով կազմակերպելու համար։
Հայաստանը Ինֆորմացիոն տեխնոլոգիաների եւ ծառայությունների համաշխարհային դաշինքի անդամ է դարձել 2004 թվականին։ Իսկ 2014 թվականին UITE–ն Մեքսիկայում անցկացված Կոնգրեսի ժամանակ Հայաստանում Կոնգրեսն անցկացնելու իրավունք է ստացել։
WCIT-ն փետրվարի 19-21-ը անցկացվել է Հնդկաստանի Հայդարաբադ քաղաքում, որից հետո Հնդկաստանը WCIT-ի 2019 թ.-ի կոնգրեսն անցկացնելու էստաֆետը հանձնել է Հայաստանին: