ՌԴ Արտաքին գործերի նախարարության պաշտոնական ներկայացուցիչ Մարիա Զախարովան հերքել է ԶԼՄ-ների լուրերն այն մասին, որ Արգենտինայից թմրանյութերի տեղափոխման համար օգտագործվել է դիվանագիտական փոստը, հաղորդում է «ՌԻԱ Նովոստին»:
Նրա խոսքով՝ արգելված նյութերի փոխադրմամբ զբաղվել է տեխնիկական անձնակազմի անդամը, մինչդեռ դիվանագիտական փոստը ձեւակերպում են դիվանագետները:
«Տեխնիկական անդամը ոչ դիվանագիտական անձնագիր է ունեցել, ոչ էլ դիվանագիտական փոստը ձեւակերպելու թույլտվություն», - ասվում է Զախարովայի մեկնաբանությունում, որը հրապարակվել է իր ֆեյսբուքյան էջում:
Խոսքը հատուկ գործողության մասին է, որի արդյունքում ռուսական եւ արգենտինյան հատուկ ծառայությունները կարողացել են կանխել գրեթե 400 կիլոգրամ կոկաինի փոխադրումը Բուենոս Այրեսից Մոսկվա: Հետաքննությունը նախաձեռնել է Ռուսաստանի դեսպան Վիկտոր Կորոնելին, ով Արգենտինայի անվտանգության նախարարությանը տեղեկացրել է դեսպանատան տարածքներից մեկում հայտնաբերված ճամպրուկներով թմրամիջոցների մասին:
Երկու երկրների հատուկ ծառայությունները կոկաինը փոխարինել են ալյուրով, GPS տրեկերներ տեղադրել ճամպրուկներում, ոստիկանությունը սկսել է լսել թմրամիջոցների փոխադրման հետ կապ ունեցող անձանց հեռախոսային խոսակցությունները: Բռնագրավված թմրամիջոցների արժեքը սեւ շուկայում մոտ 50 մլն եվրո է:
Արգենտինական Clarin պարբերականը հաղորդում է, որ թմրամիջոցները գտնվել են դեսպանատան դպրոցի շենքում: ԶԼՄ-ները նաեւ անվանում են կալանավորվածների անունները՝ Իվան Բլիզնյուկ, որը աշխատել է Բուենոս Այրեսի ոստիկանության բաժնում եւ բազմիցս այցելել է Ռուսաստան անվտանգության ծառայությունների անդամների համար կրթական ծրագրեր կազմակերպելու համար եւ Բլիզնյուկի հետ աշխատող Ալեքսանդր Չկալո:
Բացի այդ, պարբերականը պնդում է, որ փոխադրման կազմակերպմանը մասնակցություն է ունեցել հաշվապահ Ալի Աբիյանովը (Ali Abyanov),, որը, ըստ ԶԼՄ-ների տեղեկությունների, աշխատել է դեսպանատանը եւ ճամպրուկները բերել է դպրոց, ինչպես նաեւ փախուստի մեջ գտնվող «միսթեր Կ-ն», որն ըստ քննիչների՝ գլխավորել է թմրավաճառների խումբը:
ՌԴ ԱԳՆ-ն մեկնաբանել է Արգենտինայում դեսպանատանը հայտնաբերված 400 կգ կոկաինի մասին լուրերը